АҚШ президенти Дональд Трамп Эронга қарши уруш туфайли Хитой раиси Си Цзиньпин билан март ойи охирига мўлжалланган учрашувни қолдирмоқчи. Бу ҳақда Трампнинг 16 март кунги баёнотига таяниб, BBC хабар берди.
АҚШ раҳбари учрашувни “тахминан бир ойга” кечиктириш сўралганини айтди. У Эронга қарши урушни назорат қилиши учун ўзи жойида бўлиши муҳимлигини таъкидлади. Трамп ва Си Цзиньпин ўртасидаги учрашув 31 мартдан 2 апрелгача ўтказилиши режалаштирилган. Бу уларнинг 2025 йил октябрь ойидаги сўнгги юзма-юз мулоқотидан кейинги учрашуви бўлади. Трамп кечиктириш таклифини мамлакатда қолиб, урушни бошқариш зарурати билан изоҳлаган.
“Мен у (Си Цзиньпин назарда тутилган) билан учрашишни интиқлик билан кутяпман. Муносабатларимиз жуда яхши. Бунда ҳеч қандай ҳийла йўқ. Бизда уруш кетяпти. Менимча, бу ерда (АҚШда) бўлишим муҳим”, деди у.
“Президент уруш ҳаракатларини мувофиқлаштириш учун Колумбия округида қолмоқчи... Бундай вақтда хорижга чиқиш оптимал бўлмаслиги мумкин”, деди АҚШ Ғазначилик котиби Скотт Бессент.
Аввалроқ Трамп Financial Times нашрига берган интервьюсида, агар Хитой Ҳормуз бўғозини блокададан чиқаришга ёрдам бермаса, учрашувни ортга суриши мумкинлигини айтганди. Шунингдек, у бошқа давлатларни кемаларнинг ушбу йўлак орқали хавфсиз ўтишига кўмаклашишга чақирган.
Европа Иттифоқи давлатлари эса бунга рози бўлмаган, улар ҳарбий кемаларини бўғозга юборишга қарши чиққан. Хитой Эрон энергия экспортининг асосий харидорларидан бири бўлиб, АҚШ ва Исроилнинг мамлакатга қарши ҳужумларини танқид қилиб келмоқда.
