АҚШ президенти Дональд Трамп Эрон билан музокара олиб боришдан манфаатдор эмаслигини айтди. У Эронга қарши уруш Теҳрондаги ҳарбий тузилма ёки ҳокимиятда қолган раҳбарият бўлмаганда тугаши мумкинлигини таъкидлади. Бу ҳақда Reuters хабар берди.
Трампнинг айтишича, агар Эроннинг барча потенциал етакчилари ўлдирилса ва Эрон ҳарбийлари йўқ қилинса, ҳаво кампанияси керакcиз бўлиши мумкин. АҚШ президенти Air Force One бортида журналистлар билан суҳбатда шундай баёнот берди.
Маълум бир нуқтада, эҳтимол, “Биз таслим бўламиз” дейишга ҳеч ким қолмайди, деди Трамп.
АҚШ ва Исроилнинг Эронга қарши уруши 28 февраль куни бошланди. Ислом республикаси мазкур ҳужумларга жавобан АҚШнинг Яқин Шарқ давлатларидаги объектларига зарбалар йўлламоқда. Эрон президенти Масъуд Пезешкиён минтақадаги кескинликни юмшатиш мақсадида қўшни давлатларга қилинган ҳужумлар учун улардан узр сўради. Бироқ бу Эрондаги қатъий сиёсат тарафдорларининг танқидига сабаб бўлди.
“Эрон ҳаракатлари оқибатида жабр кўрган қўшни давлатлардан шахсан узр сўрайман”, деди Эрон президенти.
Масъуд Пезешкиён бу давлатларни АҚШ ва Исроилнинг Эронга ҳужумларига қўшилмасликка чақирди. У Трампнинг сўзсиз таслим бўлиши ҳақидаги талабини “хомхаёл” деб атади. Аммо мамлакатни вақтинчалик бошқараётган раҳбарият кенгаши агар Эронга зарбалар уларнинг ҳудудидан амалга оширилмаса, қўшни давлатларга ҳужумларни тўхтатишга келишиб олганини айтди.
Эрон олий раҳнамоси Оятуллоҳ Али Хоманаий ўлдирилганидан кейин мамлакатни уч кишидан иборат муваққат кенгаш бошқармоқда. Унинг таркибига президент Масъуд Пезешкиён, суд ҳокимияти раҳбари Ғулом Ҳусайн Муҳсиний-Эжеий ва Оятуллоҳ Ориф киради.
Трамп Эрон олий раҳнамосини шахсан танламоқчи
АҚШ президенти Эронда ҳокимият тепасига марҳум олий раҳнамо Оятуллоҳ Али Хоманаийнинг ўғли келишига қарши. Трамп янги олий раҳнамони танлашда шахсан иштирок этиш ниятини билдирди.
“Бекорга вақт сарфлашяпти. Хоманаийнинг ўғли — ҳеч ким. Мен Венесуэлада Делси (Родригес) билан бўлгани каби тайинловда иштирок этишим керак”, деган Трамп.
У АҚШ ҳарбийлари Венесуэла президенти Николас Мадурони ўғирлаб кетгач, унинг лавозимини вақтинча эгаллаган Родригесни назарда тутган.
Трамп аввалги сиёсатни давом эттирадиган ҳар қандай ворис АҚШ учун номақбул эканини таъкидламоқда. Агар унга маъқул номзод тайинланмаса, Қўшма Штатлар “беш йил ичида яна уруш бошлашига тўғри келиши”ни айтган.
Аввалроқ Трамп бу лавозимга “учта жуда яхши номзод” борлигини айтиб, уларнинг номини очиқламаганди. У, шунингдек, Эрон ҳукуматининг аксарият аъзолари, агар Теҳрон Вашингтон билан Венесуэлада бўлгани каби ҳамкорликни бошласа, ўз лавозимларини сақлаб қолиши мумкинлигига ваъда берди. Трамп янги раҳбар “Эронга уйғунлик ва тинчлик олиб келиши” кераклигини таъкидламоқда.
