Машҳур MMA менежери Али Абдеулазиз UFC промоушени ярим ўрта вазн тоифасининг амалдаги чемпиони Ислам Махачев иштирокида катта тўқнашув тайёрлаётганини эълон қилди.
“Шуни айтишим мумкинки, UFC Ислам Махачев учун улкан жанг устида иш олиб бормоқда. Гап Иан Герри ҳақида кетмаяпти. Рақиб анча машҳурроқ. Бу ҳозирги вақтда UFC ташкил қилиши мумкин бўлган энг йирик жанглардан бири бўлади. Биз билан қолинг”, деб ёзди Махачевнинг менежери ижтимоий тармоқлардаги саҳифасида.
Аввалроқ Махачев билан жангга асосий даъвогарлар сифатида Иан Гарри ва Майкл Моралес кўрилаётган эди. Шунингдек, Исломнинг ўзи Камару Усмон билан куч синашиш истаги борлигини билдирган эди.
Хабарларга кўра, Махачев иштирокидаги ҳимоя жанги UFC’нинг Оқ уйдаги турнирида ўтказилиши кутилмоқда. Маълумот учун, MMA оламида 2026 йилнинг энг муҳим воқеаларидан бири бўлиши айтилаётган ушбу мусобақа 14 июнь куни ташкил этилади.
Дастлаб расмий манбаларда турнир АҚШ мустақиллигининг 250 йиллиги муносабати билан 4 июль санасига режалаштирилгани қайд этилган эди. Бироқ логистика масалалари инобатга олиниб, тадбир 14 июнь санасига кўчирилган. Айнан шу куни АҚШ президенти Дональд Трамп 80 ёшга тўлади.
Дональд Трампнинг таъкидлашича, Оқ уй қаршисида қуриладиган арена 100 минг нафаргача томошабинга мўлжалланган бўлади. Бу Оқ уй ҳудудида ўтказиладиган тарихдаги илк профессионал спорт тадбири сифатида йилномалардан жой олади.
