Испания Эронга қарши ҳужумлар учун АҚШга Рота ва Морон ҳарбий базаларидан фойдаланишга рухсат бермайди. Бу ҳақда мамлакат ташқи ишлар вазири Хосе Мануэл Альбарес маълум қилди.
Вазир АҚШ ва Испаниянинг қўшма бошқарувида бўлган, аммо Испания суверенитети остида қолаётган базалар ҳарбий операцияда иштирок этмаслигини таъкидлади.
Испания базалари ушбу операция учун ишлатилмайди. Улар АҚШ билан тузилган келишувда кўзда тутилмаган ёки БМТ Низомига мос келмайдиган ҳаракат учун фойдаланилмайди, деди Альбарес.
Reuters маълумотларига кўра, АҚШ ва Исроилнинг Эронга зарбалари бошланганидан кейин Испания жанубидаги базалардан Американинг 15 та самолёти ҳавога кўтарилган. Парвозларни кузатувчи FlightRadar24 хизмати улардан камида еттитаси Германиянинг Рамштайн авиабазасига қўнганини маълум қилган. Гап, хусусан, Испанияда доимий асосда жойлаштирилган Boeing КC-135 Stratotanker ёнилғи қуювчи самолётлари ҳақида бормоқда.
Тўққизта ёнилғи қуювчи самолёт Морон базасидан учиб, Германияга йўл олган. Яна иккита самолёт Рот базасини тарк этиб, Франция жанубига йўл олган. Қолган тўртта рейснинг йўналиши кўрсатилмаган.
Аввалроқ Буюк Британия Эронга қарши операция учун ўз базаларини тақдим этишга рози бўлмаганди. Бироқ 1 март куни бош вазир Кир Стармер “жамоавий ўзини ўзи мудофаа қилиш”ни рўкач қилиб, АҚШнинг улардан фойдаланишни маъқуллади. Дастлабки кечикиш учун АҚШ президенти Дональд Трамп уни танқид қилган эди.
Испания АҚШ ва Исроилнинг Эрон ҳудудига берган зарбаларини қоралади. Бош вазир Педро Санчес бошчилигидаги ҳукуматнинг позицияси минтақадаги бошқа бир қатор мамлакатлардан ажралиб туради ва Мадриднинг Вашингтон билан муносабатларини мураккаблаштириши мумкин.
