Малайзияда сил (туберкулёз) эпидемияси авж олди. Соғлиқни сақлаш вазирлиги томонидан 21 февраль куни эълон қилинган баёнотга кўра, 8 февралдан 14 февралгача бўлган бир ҳафта ичида мамлакатда 596 та сил билан касалланиш ҳолати қайд этилган. Бу ҳақда The Straits Times хабар берди.
Маълум қилинишича, мамлакат бўйлаб касалланганларнинг умумий сони 3 161 нафарга етган. Мутахассислар ёпиқ, ҳаво айланиши ёмон ва одамлар билан гавжум жойлар вирус тарқалиши учун қулай муҳит эканидан огоҳлантирмоқда. Айниқса, касалликка чалинган ва даволанмаётган шахслар билан узоқ вақт мулоқотда бўлиш хавфни оширади.
Рамазон ва ижтимоий масофа
Соғлиқни сақлаш вазирлиги рамазон ойининг ўзи касаллик тарқалишига бевосита сабабчи эмаслигини, бироқ ифторлик тадбирлари ва бозорлардаги гавжумлик мулоқотни кўпайтириши ҳақида огоҳлантирмоқда.
“Сил грипп ёки коронавирус каби тез тарқалмайди, у одатда инфекция ташувчиси билан узоқ ва такрорий алоқани талаб қилади. Шунга қарамай, жамоавий ҳушёрлик ва эрта ташхис қўйиш эпидемияни тўхтатишнинг асосий омилидир”, дейилади расмий баёнотда.
Ҳудудлар бўйича вазият
Касаллик энг кўп қайд этилган ҳудудлар рўйхатида Сабаҳ штати 755 та ҳолат билан етакчилик қилмоқда. Ундан кейинги ўринларни Селангор (596) ва Саравак (332) штатлари эгаллаган. Пойтахт Куала Лумпур ва Путражаяда эса 244 та ҳолат аниқланган. Энг кам касалланиш Лабуан федерал ҳудудида (18 та ҳолат) кузатилган.
Вазирлик аҳолига қуйидаги тавсияларни бермоқда:
- йўталиш ва аксириш одобига риоя қилиш;
- хоналарни тез-тез шамоллатиб туриш;
- гавжум жойларда ёки касаллик аломатлари сезилганда ниқоб тақиш;
- икки ҳафтадан ортиқ давом этган йўтал кузатилса, зудлик билан шифокорга мурожаат қилиш.
Ҳукумат жамоатчиликни ҳушёрликка чорлар экан, фақатгина биргаликдаги ҳаракатлар орқали хавфсиз ва соғлом рамазон ойини таъминлаш мумкинлигини таъкидламоқда.
