Украинада собиқ энергетика вазири Герман Галушченко мамлакатни тарк этишга уринган пайтда қўлга олинди. Бу ҳақда расмий манбаларга таяниб, BBC хабар берди.
Галушченко 2025-йили коррупция можаросида айбланган амалдорлар орасида бўлгани учун ҳукуматдаги лавозимидан четлатилганди. У поезддан туширилиб қўлга олинган ва сўроқ учун Киевга олиб кетилгани айтилмоқда.
Галушченко ноябрь ойида фош этилган 100 миллион доллар миқдоридаги маблағни ўзлаштириш схемасига алоқадорликда гумон қилинаётган бир нечта амалдорлардан бири ҳисобланади.
Украина Коррупцияга қарши курашиш миллий бюроси собиқ вазир “Мидас иши” доирасида “давлат чегарасини кесиб ўтаётганда” ҳибсга олинганини маълум қилди. Баёнотда Галушченконинг исми тўғридан-тўғри тилга олинмаган, бироқ бир нечта йирик маҳаллий ОАВлар гап айнан у ҳақида кетаётганини ёзди.
Галушченко “Энергоатом” пудратчиларидан шартнома қийматининг 10–15 фоизи миқдорида тизимли равишда пул олганликда гумон қилинаётган амалдорлардан бири сифатида тилга олинган. У аввалроқ ўзига қўйилган айбловлар юзасидан ўзини ҳимоя қилишини билдирган.
Галушченко 2025-йилда коррупция можаросида тилга олинган амалдорлар қаторида бўлгани сабабли ҳукуматдаги лавозимидан четлатилган. У уч йил давомида энергетика вазири бўлиб ишлаган, кейин эса қисқа муддат адлия вазири лавозимини эгаллаган. Ноябрь ойида президент Владимир Зеленский унинг истеъфосини сўраган. Унинг ўрнини эгаллаган Свитлана Хринчук ҳам можаро сабаб лавозимидан кетган.
Мазкур можаро Россиянинг кенг кўламли босқинидан олдин коррупцияни йўқ қилиш ваъдаси билан ҳокимиятга келган президент Владимир Зеленский маъмуриятига жиддий салбий таъсир кўрсатди. Зеленский офиси раҳбари Андрей Ермакнинг уйи тинтув қилинганидан сўнг у ҳам истеъфога чиққан.
Шунингдек, коррупция можароси 2022-йилда уруш бошланганидан буён ҳарбий ҳолат сабаб ўтказилмаётган сайловларни ташкил этиш масаласида АҚШ босимини кучайтирди.
