Халқаро Олимпия қўмитаси (ХОҚ) украиналик скелетончи Владислав Гераскевичга Россия босқини оқибатида ҳалок бўлган спортчилар суратлари туширилган шлемда Олимпиадада иштирок этишга рухсат бермади ва уни мусобақалардан четлатди.
Спортчига огоҳлантиришлар берилган бўлса-да, у тақиқланган жиҳоздан фойдаланишда давом этган. ХОҚ эса Гераскевич Олимпия хартиясини бузганини маълум қилган.
Украина Миллий Олимпия қўмитаси Милан ва Кортина-д’Ампессо шаҳарларида ўтказилаётган Олимпия ўйинлари ташкилотчиларидан Гераскевичга шлемни ишлатишга рухсат беришни сўради, чунки ташкилот назарида у тўлиқ хавфсизлик талабларга жавоб беради ва ХОҚ қоидаларини бузмайди. Шунингдек, шлем реклама, сиёсий шиорлар ёки дискриминацион элементларни ўз ичига олмайди ва расмий машғулотлар вақтида белгиланган стандартларга мослиги тасдиқланган.
Бироқ ХОҚ расмий вакили Марк Адамс бош кийимга бундай тасвирлар тушириш қоидаларга зид эканлигини маълум қилди:
“ХОҚ спортчиларнинг ушбу можарода ҳалок бўлган дўстлари хотирасини ҳурмат қилиш истагини тушунади. У машғулот вақтида шуни қилган ва ижтимоий тармоқларда ўз ҳис-туйғуларини билдирган”.
Гераскевич учун ҳалок бўлганлар хотирасига қора тасма тақишга рухсат берилган.
Олимпия хартиясида ёзилишича, Олимпия объектлари ва бошқа мусобақа ўтказиладиган жойларда ҳар қандай сиёсий, диний ёки ирқий тарғибот тақиқланади.
Шунингдек, Гераскевич Милан Олимпиадасининг очилиш маросимида Украина байроғини кўтариб чиққан, шлем ишлатишга ХОҚ рухсат бермаганини айтган ва бу қарорни “юракни синдирадиган қарор” деб атаб, ижтимоий тармоқ орқали фикрларини билдирган.
ТАСС ахборот агентлиги хабарига кўра, Россия томони Владислав Гераскевични Олимпиададан четлатиш масаласида ҳеч қандай босим ўтказмаган.
“Мен бу борада бирор сўзни ҳам эшитмадим. Россия ҳукумати шлем масаласида бизга ҳеч қандай хабар юборганига ишонмайман”, дейди Адамс ТАССга берган интервьюсида.
