Миллиардер футболчи Криштиану Роналду дўкон сотувчиси ва собиқ официант Жоржина Родригес билан танишганида, бу замонавий эртакнинг бошланиши бўлган эди. Тасодифий учрашув, “бир қарашда севги” ва оддий ҳаётдан ҳашамат сари йўл. Бу ҳикоя ҳанузгача миллионлаб мухлисларни илҳомлантириб келади.
1985-йилда Мадейра оролида туғилган Роналду бугунги кунда футбол тарихидаги энг машҳур спортчилардан бири саналади. 23 йилдан ортиқ давом этаётган профессионал фаолияти давомида португалиялик ҳужумчи нафақат спорт, балки молиявий жиҳатдан ҳам улкан чўққиларни забт этди. Турли манбаларга кўра, унинг умумий бойлиги 2026-йилга келиб 500 миллион фунт стерлингдан ошган.
41 ёш бўлишига қарамай, Роналду фаолиятини Саудия Арабистонининг “Ан-Насср” клуби сафида давом эттирмоқда ва жамоанинг асосий етакчиларидан бири ҳисобланади. У Саудия футболининг глобал миқёсда оммалашишида муҳим рол ўйнаб, лига рамзига айланган.
Фаолияти давомида Роналду Лиссабоннинг “Спортинг”, Англиянинг “Манчестер Юнайтед”, Испаниянинг “Реал Мадрид”, Италиянинг “Ювентус” клублари ҳамда Португалия терма жамоаси сафида ёрқин ўйинлар намойиш этди. Айниқса, “Реал Мадрид”даги даври унинг футболчилик фаолиятидаги энг муваффақиятли босқич сифатида эътироф этилади.
Португалиялик ҳужумчи ҳозирга қадар 35 дан ортиқ жамоавий совринларни қўлга киритган. У беш бор “Олтин тўп”, тўрт марта олтин бутса, беш бор УЕФА Чемпионлар Лигаси, шунингдек, Европа чемпионати ва Миллатлар Лигаси ғолиби бўлган. Роналду Чемпионлар Лигаси тарихидаги энг кўп гол урган футболчи сифатида рекордчи ҳам ҳисобланади.
У профессионал фаолияти давомида 1100 дан ортиқ расмий учрашувда майдонга тушиб, клуб ва терма жамоалар сафида 961 та гол муаллифига айланган. Бу кўрсаткичлар уни қанчалар машҳур ва иқтидорли футболчи эканлигини исботлайди.
Роналдунинг шахсий ҳаёти
Криштиану Роналду шахсий ҳаётини доимо оммадан йироқ тутишга ҳаракат қилган. 2010 йил июнь ойида АҚШда унинг биринчи фарзанди — Криштиану Жуниор дунёга келган. Футболчи боланинг онаси кимлигини ошкор қилмаган ва тўлиқ васийликни ўз зиммасига олганини билдирган. Бугунги кунда Роналду Жуниор отасининг изидан бориб, футбол билан жиддий шуғулланмоқда.
2017 йил 8 июнда Роналду эгизак фарзандлар — Матео ва Эва Мариянинг отаси бўлди. ОАВ маълумотларига кўра, улар суррогат она орқали туғилган.
Роналдунинг отаси Жозе 2005-йилда спиртли ичимликлар билан боғлиқ жигар хасталиги сабаб 52 ёшида вафот этган. Шундан сўнг футболчи соғлом турмуш тарзига қатъий амал қилиб келади: у спиртли ичимлик ичмаслигини таъкидлаб келади, мунтазам равишда қон ва суяк илиги донорлигида қатнашади.
Роналду хайрия ишлари билан ҳам танилган. Хусусан, 2015-йилда Непалда юз берган вайронкор зилзила оқибатларини бартараф этиш учун 5 миллион фунт стерлинг хайрия қилган. Ўшанда у дунёнинг энг саховатли спортчиларидан бири сифатида эътироф этилган.
Роналду ва Жоржина қачон танишган?
2016-йилда Жоржина Родригес 22 ёшда бўлиб, Мадриддаги “Gucci” дўконида сотувчи бўлиб ишлаган ва ҳафтасига тахминан 250 фунт стерлинг маош олган. У Испаниянинг Хака қишлоғида камтарона оилада улғайган. Отаси — аргентиналик Хорхе собиқ футболчи, онаси Ана эса испаниялик бўлган.
Болалигида Жоржина балерина бўлишни орзу қилган, бироқ оиланинг молиявий имконияти бунга йўл қўймаган. Дастлаб официант бўлиб ишлаган, кейинчалик Сан-Себастьянда “Massimo Dutti” дўконида иш бошлаган.
2012-йилда инглиз тилини ўрганиш мақсадида 17 ёшида Англияга кўчиб, Бристол шаҳрида энага бўлиб ишлаган. Испанияга қайтгач, Мадридда “Gucci” дўконида иш топган ва айнан шу ерда Криштиану Роналду билан танишган. Жоржина кейинчалик бу учрашувни “икковимиз учун ҳам бир қарашда севги” деб таърифлаган. Бир неча кундан сўнг улар мода тадбирида яна учрашиб, яқинроқ суҳбатлашиш имконига эга бўлган.
2017-йилнинг 12 ноябрида Роналду ва Жоржина Родригеснинг илк фарзанди — Алана Мартина дунёга келди. Бу қизча футболчи ҳаётида алоҳида ўрин эгаллайди ва кўпинча отаси билан бирга ижтимоий тармоқларда кўриниш беради. 2022 йил Роналду оиласи учун ҳам қувончли, ҳам қайғули бўлди. Жоржина эгизак фарзандларга ҳомиладор бўлиб, Белла Эсмералда исмли қизалоқ соғ-саломат туғилди. Бироқ унинг эгизак акаси — Анхел туғилиш чоғида вафот этди. Роналду бу йўқотишни ҳаётидаги энг оғир синовлардан бири сифатида таърифлаган.
2019-йилда ITV’га берган интервьюсида Роналду Жоржина билан “ҳақиқий севги”ни топганини айтиб, у билан албатта расмий никоҳдан ўтишини билдирган.
2025 йил 11 август куни Роналду Жоржинага турмуш қуриш таклифини берди. Родригес Instagram саҳифасида йирик бриллиант узук акс этган суратни жойлаб, “Ҳа, бирга бўлишни истайман. Ҳозирги ҳаётимда ҳам, кейингисида ҳам”, дея изоҳ қолдирган. Хабарларга кўра, жуфтлик 2026-йилда турмуш қуришни режалаштирмоқда.
Оила ва ҳаёт тарзи
Бугунги кунда Жоржина Роналду билан бирга беш нафар фарзандни тарбияламоқда. У дунёдаги энг машҳур футболчининг турмуш ўртоғи (WАG) бўлса-да, ўзини оддий ва вазмин тутишини таъкидлайди.
Жуфтлик 18 миллион фунт стерлинглик шахсий самолёт, ҳашаматли яхта ва Роналду эгалик қиладиган “Bugatti Veyron” каби қимматбаҳо автомобильларга эга. Шунингдек, Жоржина 2017–2018-йилларда Мадридда молиявий ҳисоб ва солиқлар бўйича таҳсил олиб, ўз даромадини мустақил бошқаришни мақсад қилганини билдирган.
Криштиану Роналду ва Жоржина Родригес ҳикояси бугун шунчаки машҳур футболчи ва унинг турмуш ўртоғи ҳақида эмас. Бу — меҳнат ва сабр уйғунлигида шаклланган замонавий муваффақият тимсолидир. Оддий дўкондан бошланган танишув вақт ўтиб дунёнинг энг машҳур оилаларидан бирига айланди, Роналду нафақат футбол майдонидаги бетакрор футболчи, балки меҳрибон ота сифатида ҳам ўзини намоён этмоқда.
Майдонда рекордлар, ҳаётда масъулият, оилада эса меҳр — Роналду ва Жоржина ҳикояси давом этмоқда. Олдинда уларни янги совринлар ва оилавий ҳаётдаги муҳим лаҳзалар кутмоқда.
