АҚШ президенти Дональд Трамп 6 февраль куни имзоланган фармонида Эрон билан савдони давом эттираётган мамлакатларга қўшимча божлар киритиши мумкинлигини айтди. Бу ҳақда BBC хабар берди.
Фармойишда жорий этилиши мумкин бўлган ставка кўрсатилмаган, бироқ 25 фоиз мисол сифатида келтирилган. Бу “Эрондан ҳар қандай товар ёки хизматларни бевосита ёки билвосита сотиб оладиган, импорт қиладиган” исталган давлатдан АҚШга олиб кириладиган маҳсулотларга нисбатан қўлланади.
Трамп мазкур янгилик бўйича изоҳ бермади, бироқ 6 февраль куни самолёт бортида журналистлар билан суҳбатда Эрон учун “ядро қуроли йўқлиги”ни таъкидлади.
Бу баёнот АҚШ ва Эроннинг юқори мартабали расмийлари ўртасида Уммонда давом этаётган музокаралар фонида янгради. Томонлар бир неча ҳафта давомида ўзаро таҳдидли баёнотлар алмашган эди.
Трамп 2026 йил бошида Эрон билан бизнес олиб бораётган мамлакатларга 25 фоизлик бож жорий этиш билан таҳдид қилганди. У 12 январь куни Truth Social ижтимоий тармоғидаги постида шундай ёзган:
“Дарҳол кучга киради, Эрон билан бизнес қилаётган ҳар қандай давлат Америка Қўшма Штатлари билан амалга оширадиган барча савдолар учун 25 фоизлик бож тўлайди”, деган эди у.
Ўшанда божлар амалда қандай ишлаши ҳақида қўшимча тафсилот берилмаган эди. Оқ уйга кўра, сўнгги фармойиш Эронга нисбатан “амалда бўлган миллий фавқулодда ҳолат”ни яна бир бор тасдиқлайди. Шунингдек, вазият ўзгарса, президент ҳужжатга ўзгартириш киритиши мумкинлиги қайд этилган.
“Президент Эронни ядровий салоҳиятга интилиш, терроризмни қўллаб-қувватлаш, баллистик ракеталарни ишлаб чиқиш, Америка, иттифоқчилари хавфсизлиги ва манфаатларига таҳдид соладиган минтақавий беқарорлик учун жавобгарликка тортмоқда”, дейилган баёнотда.
