Ўзбекистон терма жамоаси ҳужумчиси Элдор Шомуродов Туркия Кубогининг 3-туридан ўрин олган “Карагюмрук” ва “Башакшеҳир” (1:4) жамоалари ўртасидаги учрашувнинг 26-дақиқасида жароҳат сабаб алмаштирилди.
Championat.asia нашрининг хабар беришича, футболчи ўйин давомида оғриқ ҳис қилган ва мураббийлар штаби билан келишилган ҳолда эҳтиёт чораси сифатида захирага олинган. Айни пайтда Шомуродов ўзини яхши ҳис қилмоқда ва кейинги учрашувларда майдонга тушиши эҳтимоли юқори.
Эслатиб ўтамиз, мазкур баҳсда “Башакшеҳир” 4:1 ҳисобида йирик ғалабани қўлга киритди. Учрашувнинг 8-дақиқасида Аббосбек Файзуллаев ҳисобни очган бўлса, 22-дақиқада Элдор Шомуродов ҳам ўз ҳисобига битта гол ёздириб қўйди.
Маълумот учун, Элдор Шомуродов 2025-йилнинг ёзидан буён “Башакшеҳир” шарафини ҳимоя қилиб келмоқда. У жорий мавсумда истанбулликлар сафида 29 та учрашувда майдонга тушиб, 15 та гол ва 5 та ассист муаллифига айланган. Шунингдек, ҳужумчи Туркия Суперлигасининг энг яхши тўпурари ҳисобланади. Унинг ҳисобида 14 та гол ва 4 та ассист мавжуд.
