Филиппин парламенти депутатлари президент Фердинанд Маркосни лавозимидан олиш масаласини кўриб чиқмоқда. Импичмент жараёни юзасидан навбатдаги муҳокама бугун, 3 февраль куни бўлиб ўтди. Депутатлар давлат раҳбарини жамоатчилик ишончига хиёнатда, коррупция ва конституцияни бузишда айбламоқда.
Ижтимоий фаоллар президент устидан шикоят киритган. Аризалар Филиппин парламентининг Адлия қўмитасида кўриб чиқилиб, ўрганиш учун қабул қилинган. Олти йиллик президентлик муддатининг ярмига етган Маркос эса ўзига қўйилган айбловларни рад этмоқда.
Шикоятлар қўмитадан ўтгач, Вакиллар палатасига юборилади ва овозга қўйилади. Бироқ таҳлилчиларга кўра, парламентнинг бу қўмитасида президент тарафдорлари устунлик қилади. Шу боис жараён фаоллар умид қилганидек якунланмаслиги мумкин.
Вакиллар палатаси Маркосга қарши импичментни қўллаб-қувватлаган тақдирда, у Жозеф Эстрададан сўнг мана шу жараённи бошдан кечирган иккинчи президент бўлади. Бироқ 2000-йили депутатларнинг Эстрадани лавозимдан четлатиш ҳаракатлари самара бермаган, шундан сўнг Олий суд давлат раҳбарини истеъфога чиқарганди.
Шикоятларда президент Маркоснинг ўзидан олдинги давлат раҳбари Родриго Дутертени ҳибсга олишга рухсат бергани ҳам келтирилган. Собиқ президент “гиёҳвандликка қарши уруш” кампанияси доирасида минглаб инсонларнинг ўлдирилишида айбланади. Гаагада суди унга қарши ишни кўриб чиқяпти.
Президент, бундан ташқари, давлат маблағини суиистеъмол қилиш, хусусан, сув тошқинларига қарши лойиҳаларда коррупцияга йўл қўйишда айбланмоқда. Шунингдек, шикоятда президент гиёҳванд моддалар истеъмол қилгани ҳақида даъволар бор. Маркос ўзига қўйилган айбловларни қатъиян рад этди.
Агар қуйи палата импичментни маъқулласа, иш Сенатга юборилади. Бу жараёнда ҳакамлар ҳайъати вазифасини 24 нафар сенатор бажаради. Парламентнинг Адлия қўмитаси раиси Гервилле Луистрога кўра, шунчаки қонунбузарликнинг ўзи етарли эмас, у импичментга асос бўладиган даражада жиддий бўлиши лозим.“Президент аввал ҳам айтган. У ҳеч қандай қонунни бузмаган ва импичментга сабаб бўладиган жиноят содир этмаган”, деди президент матбуот котиби Клер Кастро.
