Португалиялик ҳужумчи Криштиану Роналду Саудия Арабистонининг “Ан-Насср” клубидаги вазиятдан норози ва жамоа ўйинларида иштирок этишдан бош тортмоқда. Бу ҳақда Португалиянинг А Бола нашри хабар берди.
Манбага кўра, Роналду “Ан-Насср”нинг навбатдаги “Ар-Риёд”га қарши учрашувини ўтказиб юбормоқчи.
Криштиану Роналду Саудия Арабистони Давлат инвестиция жамғармаси (ПИФ) томонидан олиб бориладиган бошқарувдан норози. Шунингдек, у “Ан-Насср”га етарли даражада инвестиция киритилмаётганидан шикоят қилмоқда. Роналдунинг фикрича, клуб раҳбарияти “Ал-Насср” манфаатларига зарар етказмоқда, айниқса трансфер бозорида анча фаол бўлган “Ал-Ҳилол” билан солиштирганда.
Криштиану Роналду 2023 йилдан буён “Ан-Насср” сафида тўп сурмоқда. Футболчининг клуб билан тузилган шартномаси 2027 йилгача амал қилади.
Маълумот учун, “Ан-Насср” Саудия Арабистони чемпионати доирасида 18 та учрашув ўтказиб, 43 очко жамғарган ва турнир жадвалида иккинчи ўринда бормоқда. Пешқадам “Ал-Ҳилол” ҳисобида эса 18 ўйиндан сўнг 46 очко мавжуд.
“Ан-Насср” навбатдаги учрашувини 2 февраль куни “Ар-Риёд” жамоасига қарши ўтказади. Мусобақа тўпурарлар жадвалида Криштиану Роналду 17 та гол билан иккинчи ўринда бормоқда. Пешқадам эса “Ал-Аҳли” ҳужумчиси Айван Тони бўлиб, унинг ҳисобида 18 та гол мавжуд.
