FIFA президенти Жанни Инфантино Россия клублари ва терма жамоаларининг халқаро мусобақаларда иштирок этишига қўйилган тақиқни бекор қилиш масаласини кўриб чиқиш лозимлигини билдирди. У бу ҳақда Британиянинг Sky телеканалига берган интервьюсида маълум қилди.
“Россия жамоаларига нисбатан санкцияларни бекор қилиш масаласини кўриб чиқиш керакми? Албатта, буни қилишимиз шарт. Ҳеч бўлмаганда ёшлар даражасида. Чунки бу тақиқ ҳеч қандай фойда бермади, аксинча, янада кўпроқ норозилик ва нафратни келтириб чиқарди”, деди Инфантино.
Шунингдек, FIFA раҳбари ташкилот қоидаларига ўзгартириш киритиш ва миллий жамоаларнинг сиёсий сабабларга кўра футбол ўйнашдан четлатилишига йўл қўймаслик бўйича аниқ норма белгиланиши зарурлигини таъкидлади.
Эслатиб ўтамиз, УЕФА ва FIFA томонидан Россия футбол иттифоқига нисбатан санкциялар 2022-йилнинг февраль–март ойларида жорий этилган эди. Россия Украинага қарши ҳарбий юришлари сабаб санкцияга учраган. Шу боис тўрт мавсумдан бери Россия Премьер Лигаси (РПЛ) вакиллари Еврокубокларда иштирок этмаяпти. Валерий Карпин бошчилигидаги миллий терма жамоа эса фақат ўртоқлик учрашувлари ўтказмоқда.
