Римнинг “Лацио” клуби марказий ҳимоячиси Марио Ҳила жамоасини ўзгартириши мумкин. Sempreinter нашрининг хабарига кўра, 25 ёшли футболчига Италиянинг “Милан” клуби қизиқиш билдирмоқда.
Манбада қайд этилишича, “россонерилар” испаниялик ҳимоячи учун 20 миллион евро тўлашга тайёр. Милан клуби ушбу харидни ёзги трансфер ойнаси вақтида амалга оширмоқчи. Чунки ўша пайтда футболчининг “Лацио” билан амалдаги шартномасига бир йил қолади. Бу ҳолатда римликлар Мариони арзон нархда сотиб олиш имкониятига эга бўлади.
Марио Ҳила 2022 йил ёзида Мадриднинг “Реал” клуби ёшлар жамоасидан “Лацио” сафига 6 миллион евро эвазига кўчиб ўтган. ОАВ маълумотларига кўра, келишувга биноан “қироллик клуби” футболчининг кейинги трансферидан тушадиган маблағнинг 50 фоизини олади. Шу боис, агар “Милан” ва “Лацио” ўртасидаги битим амалга ошса, Мадриднинг “Реал” клуби 10 миллион евро даромад олади.
Маълумот учун, Марио Ҳила жорий мавсум “Лацио” сафида жами 22 та учрашувда майдонга тушган. Унинг римликлар билан шартномаси 2027-йилнинг ёзига қадар амал қилади. Transfermarkt портали футболчининг қийматини 30 миллион еврога баҳоламоқда.
