Германиянинг “Бавария” клуби ярим ҳимоячиси Майкл Олиисе Бундеслиганинг “Лейпциг”га қарши ўйини асосий қаҳрамонларидан бирига айланди. “Лейпциг Арена”да ўтган баҳсда Мюнхен жамоаси рақибини 5:1 ҳисобида мағлуб этди.
Франциялик футболчи 56-дақиқада майдонга тушди ва қолган вақт ичида учта голга ассист амалга оширди, шунингдек, ўйиннинг охирида, 88-дақиқада ўзининг голи билан ҳисобни 5:1 кўринишга келтирди.
Opta маълумотларига кўра, 2004/2005 йилги мавсумдан бери фақат битта футболчи захирадан тушиб учта ассист амалга оширган — бу Франк Рибери бўлиб, у 2019 йилда “Бавария”нинг “Вольфсбург”га қарши ўйинида шундай натижага эришган эди.
Аввалроқ, франциялик футболчи Бундеслигадаги дастлабки 50 та учрашувда энг кўп ассист қайд этган футболчига айланган эди.
Жорий мавсумда 23 ёшли вингер барча мусобақалар доирасида 28 та учрашувда майдонга тушиб, 13 та гол ва 20 та голли узатма муаллифига айланди. Олисе “Бавария” сафига 2024 йил ёзида Англиянинг “Кристал Пэлас” клубидан келиб қўшилган. Мюнхен клуби сафида у 83 та ўйинда иштирок этиб, 33 та гол урган ва 43 та голли узатма амалга оширган. Transfermarkt портали унинг трансфер нархини 130 миллион еврога баҳолаган.
Фрэнк Рибери эса 2007–2019 йиллар давомида “Бавария” сафида 425 та учрашувда 124 та гол ва 182 та голли узатмага муаллифлик қилган.
