Украина Коррупцияга қарши курашиш миллий бюроси (NABU) ва Коррупцияга қарши курашишга ихтисослашган прокуратура (САP) парламент фраксиялардан бирига раҳбарлик қилаётган сиёсатчига нисбатан тергов бошлади. У депутатларни “сотиб олиш”да гумонланяпти.
Коррупцияга қарши кураш идоралари расмий пресс-релизида гумонланувчининг исми кўрсатилмаган. Бироқ САP матбуот котиби Олга Постолюк “РБК-Украина” билан суҳбатда гап собиқ бош вазир, “Баткившина” партияси етакчиси Юлия Тимошенко ҳақида кетаётганини тасдиқлаган.
Маълум қилинишича, Тимошенко Украина Жиноят кодексининг 369-моддаси 4-қисми, яъни мансабдор шахсларга ноқонуний моддий манфаат таклиф қилишда гумонланмоқда. Ушбу модда бўйича энг оғир жазо 10 йилгача озодликдан маҳрум этишни назарда тутади. Тергов ҳужжатларига кўра, бошқа фраксияларга мансуб қарийб 20 нафар депутат ҳам муайян қонун лойиҳалари бўйича “ўз овозларини сотган” бўлиши мумкин. NABU ва САP ходимлари “Баткившина” партиясининг Киевдаги офисида тинтув ўтказган.
Прокурорлар версиясига кўра, Тимошенко айрим депутатларга уларнинг овоз бериш жараёнларидаги хайрихоҳлиги эвазига моддий манфаат таклиф қилган. Баёнотдан маълум бўлишича, гап бир марталик келишувлар эмас, балки узоқ муддатга мўлжалланган тизимли ҳамкорлик ҳақида кетган. NABU, шунингдек, Тимошенко ва депутатлар ўртасидаги суҳбат экани айтилган аудио ёзувларини эълон қилди.
Маҳаллий нашрлар хабарига кўра, суҳбат давомида улар овозлар эвазига ҳақ тўлаш масалалари муҳокама қилишган. Бундан ташқари, Украина Хавфсизлик хизмати раҳбари Василий Малюкни лавозимдан озод этиш, шунингдек, Михаил Фёдоров ва Денис Шмигални рақамли трансформация вазири ҳамда мудофаа вазири лавозимларидан четлатиш каби режалар ҳам тилга олинган.
Юлия Тимошенко ўзига қўйилган барча айбловларни қатъиян рад этди. У ижтимоий тармоқдаги саҳифасида пост қолдириб, партия офисидаги “шошилинч тергов ҳаракатлари” тун бўйи давом этганини, 30 дан ортиқ қуролланган шахс ҳеч қандай ҳужжациз бинога кириб, тинтув ўтказганини таъкидлади. Унинг айтишича, терговчилар ҳеч қандай далил топмаган. Бироқ иш телефонлари, ҳужжатлар ва расмий декларацияда кўрсатилган шахсий жамғармани олиб кетишган.
Тимошенко бўлаётган воқеаларни “улкан пиар-ҳаракат” деб атаб, ўзига нисбатан тергов ортида сиёсий буюртма турганини иддао қилди.
“Сайловлар яқинлашиб қолган кўринади ва кимдир рақибларни тозалашга киришди. Бу менга қарши биринчи сиёсий таъқиб эмас. Аммо мени синдириб ҳам, тўхтатиб ҳам бўлмайди,” дея ёзган у
Юлия Тимошенко ким?
Коррупцияда гумонланаётган Юлия Тимошенко мамлакатнинг энг таниқли ва тажрибали сиёсатчилардан биридир. У турли даврларда икки марта Украина бош вазири бўлган. Аввал ҳам бир неча бор жиноий ишлар доирасида қамоққа олинган, бироқ кейинчалик унга қўйилган айбловлар сиёсий таъқиб сифатида баҳоланган. Бундан ташқари, Тимошенко президентлик сайловларида ҳам бир неча бор қатнашиб, иккинчи ва учинчи ўринларни олган.
