АҚШ президентининг махсус вакили Стив Уиткофф ҳамда куёви Жаред Кушнер яқин вақт ичида Москвага бориб, Россия президенти билан учрашув ўтказиши мумкин. Мулоқот кун тартибидаги асосий масала Украина урушини якунлаш бўйича дипломатик саъй-ҳаракатлар бўлади. Бу ҳақда Bloomberg ўз манбаларига таяниб хабар берди.
Агентлик маълумотларига кўра, учрашув январь ойидаёқ ўтказилиши мумкин. Бироқ томонлар аниқ сана борасида ҳозирча бир тўхтамга кела олгани йўқ. Бунга Эронда давом этаётган норозилик намойишлари ҳамда Вашингтон-Теҳрон қарама-қаршилиги сабаб.
Bloomberg изоҳ олиш учун АҚШ мулозимларига мурожаат қилди. Оқ уй вакили агентлик сўровига жавобан ҳозирча бундай учрашув режалаштирилмаганини маълум қилди. Кремльдан эса изоҳ олишнинг имкони бўлмади. Манбаларга кўра, учрашув сурилаётганига Владимир Путиннинг қизиқиш билдирмаётгани сабаб.
Тинчлик режаси 90 фоизга тайёр
АҚШ ва Украина мулозимлари урушни дипломатик йўл билан тугатишга қаратилган саъй-ҳаракатларда сезиларли илгарилаш борлигини таъкидлади. Маълум бўлишича, Қўшма Штатлар воситачилик қилаётган 20 банддан иборат режанинг тахминан 90 фоизи келишилган. Аммо қатор муҳим масалалар ҳануз очиқ қолмоқда.
Агентлик хабарига кўра, Кремль Украина армияси Донбасснинг айрим ҳудудларидан ўз қўшинларини олиб чиқишини талаб қилмоқда. Киев эса ҳозирги фронт чизиғини музлатишни, шунингдек ҳар икки томон ҳам ўз кучларини олиб чиқиши орқали хавфсизлик зонаси яратишни таклиф қилмоқда.
Россия, бундан ташқари, Украинага НАТО қўшинлари жойлаштирилишига қарши чиқиб, босиб олинган ҳудудлар устидан Россия юрисдикцияси тан олинишини талаб қилган. Келишилмаган масалалар орасида Запорожье атом электр станцияси ҳамда Россия Марказий банкининг қарийб 300 миллиард долларлик музлатилган активлари ҳам бор.
Манбаларга кўра, АҚШ президентининг вакиллари Путин ва унинг жамоасига янгиланган тинчлик келишуви лойиҳасини тақдим этиши мумкин. Унда АҚШ ва Европанинг Украинага нисбатан хавфсизлик кафолатлари, шунингдек урушдан сўнг мамлакатни қайта тиклаш жараёнлари марказий ўрин тутади.
