Лукашенко хоккей ўйинида йиқилиб тушди (видео)

Беларусь президенти Александр Лукашенко Минскда бўлиб ўтган хоккей ўйини вақтида жамоадоши билан тўқнашиб кетиб, музга йиқилди. Бу ҳақда Спорт База Telegram канали хабар берди.

Президентга собиқ “Салават Юлаев” ва Минск “Динамо”си ҳужумчиси Ярослав Чуприс урилиб кетган. Шундан сўнг у дарҳол клюшкасини ташлаб, Лукашенкога ёрдам беришга шошилган. Воқеа акс этган видео ижтимоий тармоқларда кенг тарқалган.

Хоккей ўйини президент жамоаси ва Брест вилояти терма жамоаси ўртасида бўлиб ўтган. Натижа 5:5 ҳисобидаги дуранг билан якунланган. Ўйин тугашига бир сониядан кам вақт қолганда ҳисобни Беларусь етакчисининг ўғли — Николай Лукашенко тенглаштирган.

Кейинчалик Александр Лукашенко бел мушакларида енгил чўзилиш бўлганини, ўзини яхши ҳис қилаётганини ва кейинги ўйинга тайёргарлик кўраётганини маълум қилди.

Маълумот учун, апрель ойида Лукашенко машҳур хоккейчи Уэйн Грецки билан бирга хоккей ўйнаганини айтганди. Унинг сўзларига кўра, Грецки 2010-йилда Континентал хоккей лигаси (КХЛ) юлдузлар ўйинида қатнашиш учун Минскка келган.

Шунингдек, ўша йили Лукашенко Минск “Динамо”си хоккейчиларига совғалар топширган. Жамоа илк бор Континентал хоккей лигаси плей-оффининг иккинчи босқичига чиққан эди. Президент футболчиларга бир қути ёғ, бир нечта идишда Тожикистон асали ва жавдар нони совға қилиб, уларни ҳазил тариқасида “допинг” деб атаган.