Давлатга хиёнатда айбланган рус дипломати 12 йилга қамалди (видео)

Россия Ташқи ишлар вазирлигининг собиқ ходими, 38 ёшли Арсений Коновалов АҚШ разведкаси билан ҳамкорлик қилишда айбдор деб топилди. Суд уни 12 йил муддатга қатъий тартибли колонияга ҳукм қилди. Бу ҳақда Интерфакс Россия Федерал хавфсизлик хизматининг Жамоатчилик билан алоқалар марказига таяниб хабар берди.

Қайд этилишича, Москва шаҳар суди 2024 йил март ойида қўлга олинган Коноваловга нисбатан 100 минг рубль миқдорида жарима ҳам белгилаган, шунингдек, 1 йил муддатга эркинлигини чеклаш чораси қўллаган.

Тергов материалларига кўра, Коновалов жиноятни Россиянинг Хюстондаги Бош консуллигида иккинчи котиб лавозимида ишлаган 2014–2017-йиллар давомида содир қилган. У Россия ТИВ ихтиёридаги махфий маълумотларни ўз ташаббуси билан АҚШ разведкасига узатган ва бунинг эвазига пул олган. Унга нисбатан Россия Жиноят кодексининг 275-моддаси (давлатга хиёнат) бўйича жиноят иши қўзғатилган.

ФСБ Коновалов айнан қандай маълумотларни узатгани ва Қўшма Штатларнинг қайси идораси билан ҳамкорлик қилганига аниқлик киритмади. АҚШ махсус хизматлари ҳам вазиятга изоҳ бермаган.