АҚШ Нигерия шимоли-ғарбида ИШИД жангариларига қарши ҳаво ҳужумларини амалга оширди. Бу ҳақда президент Дональд Трамп хабар берди.
“Бош қўмондон сифатида менинг кўрсатмам билан Қўшма Штатлар Нигериянинг шимоли-ғарбий қисмида ИШИД террорчилик тўдасига қарши кучли ва ҳалокатли зарба берди”, деб ёзди Трамп ўзининг Truth Social ижтимоий тармоғидаги постида.
Унинг айтишича, ИШИД жангарилари “бегуноҳ насронийларни нишонга олиб, узоқ йиллар, ҳатто асрлар давомида кўрилмаган даражада шафқацизларча ўлдирган”.
“Мен аввал ҳам бу террорчиларни агар улар насронийларни қирғин қилишни тўхтатмаса, катта товон тўлашларидан огоҳлантирган эдим, бугун эса шундай бўлди”, деди АҚШ раҳбари.
Африкадаги операциялар учун масъул бўлган АҚШ ҳарбийларининг Африка қўмондонлиги (АFRICОМ) ҳаво ҳужуми “Нигерия расмийларининг илтимосига кўра” амалга оширилгани ва “ИШИДнинг кўплаб террорчилари” йўқ қилинганини айтди.
“Нигерия ҳукуматининг қўллаб-қувватлови ва ҳамкорлиги учун миннатдорман”, деди АҚШ Уруш вазирлиги раҳбари Пит Ҳегсет.
Бу ҳарбий ҳаракат Трампнинг аввалроқ Нигерияда “насронийлар ўлдирилаётгани” сабабли Пентагонга эҳтимолий ҳарбий чораларни режалаштиришни буюргани ортидан амалга оширилди. Нигерия ҳукумати Трампнинг айбловларини рад этиб, қуролли гуруҳлар мамлакатдаги ҳам мусулмон, ҳам насроний жамоаларни нишонга олаётганини маълум қилди.
Нигерия Ташқи ишлар вазирлиги АҚШ зарбаси ҳақида эълон қилганидан кўп ўтмай, “терроризм ва зўравон экстремизмнинг доимий таҳдидига қарши курашда халқаро ҳамкорлар, жумладан, АҚШ билан хавфсизлик соҳасида тизимли ҳамкорлик қилаётганини” тасдиқлади.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
