Дунёда илк марта ногиронлиги бор аёл космосга чиқди (видео)

Тарихда илк бор ногиронлиги бўлган шахс — германиялик муҳандис Микаэла Бентҳаус космик парвозни амалга оширди. У пастки тана қисми фалаж бўлишига қарамай, Blue Origin компанияси билан суборбитал парвозда иштирок этди. Бу ҳақда Deutsche Welle хабар берди.

Nеw Shepard космик кемасидаги парвоз 20 декабрь куни бўлиб ўтди ва 11 дақиқа давом этди. Эътиборлиси, 33 ёшли Бентҳаус космосга парвоз қилган белидан паст қисми фалаж бўлган илк инсон бўлди. У 2018-йилда велосипеддан йиқилиб жароҳат олган, шундан бери ногиронлар аравачасида ҳаракатланади.

“Тўғрисини айтсам, бу ҳаётимдаги энг ажойиб тажриба бўлди. Ҳеч қачон орзулардан воз кечиш керак эмас. Уларнинг амалга ошиши учун ҳар доим кичик имконият мавжуд”, деди Бентҳаус қўнишдан кўп ўтмай.

​​Унинг айтишича, болалигидан космосга қизиқиб келган, бунга “Юлдузлар жанги” фильмини томоша қилгани туртки бўлган.

Blue Origin компаниясининг 16-парвози

Nеw Shepard экипажи таркибига Бентҳаусдан ташқари яна беш киши, жумладан, германиялик аэрокосмик муҳандис Ҳанс Кёнигсманн ҳам кирган. У 2021-йилгача Blue Origin’нинг рақобатчиси. миллиардер Илон Маскка тегишли SpaceX компаниясида муҳандис бўлиб ишлаган.

“Ер ва унинг атмосфераси кўриниши ажойиб, аммо қора фон мен ўйлаганимдан кўра чуқурроқ бўлиб чиқди”, деди Кёнигсманн қўнишдан сўнг.

​Маълумотларга кўра, ушбу миссия америкалик миллиардер Жефф Безосга тегишли Blue Origin компаниясининг 16-пилотли парвози ҳисобланади. Сўнгги йилларда 80 га яқин бадавлат мижоз қисқа космик парвозларга чиққан. Улар орасида америкалик машҳурлар ҳам бор. Парвоз чипталари нархи ошкор қилинмаган.