Украиналик боксчи Олександр Усикнинг Қримдаги мол-мулки мусодара қилинди. Бу ҳақда Қрим Давлат кенгаши спикери Владимир Константинов ўзининг Telegram-каналида маълум қилди.
Константиновнинг айтишича, Киев билан ҳамкорлик қилган ва бир вақтнинг ўзида Қрим ҳудудида даромад топиб келган 84 нафар жисмоний ва юридик шахсга тегишли мол-мулк мусодара қилинган. Улар орасида собиқ мутлақ жаҳон чемпиони, украиналик боксчи Олександр Усик ҳам бор.
Қайд этилишича, Усик Россия томонидан бошланган урушни бир неча бор очиқ танқид қилган ҳамда Украина Қуролли кучлари эҳтиёжлари учун маблағ йиғиш тадбирларини ташкил этган. Унинг ушбу ҳаракатлари ортидан 2022 йил апрель ойида Симферопол шаҳар кенгаши (Қрим) уни шаҳар фахрий фуқароси унвонидан маҳрум қилган эди.
Эслатиб ўтамиз, Олександр Усик 20 июль куни бўлиб ўтган сўнгги жангида британиялик Даниэль Дюбуани мағлуб этиб, иккинчи бор супер оғир вазн тоифасида мутлақ жаҳон чемпионига айланди. 38 ёшли боксчи WBC, WBA ва WBO камарлари билан бирга IBF чемпионлик титулини ҳам қўлга киритди. Ноябрь ойида эса Усик WBO камаридан воз кечиб, мутлақ чемпион унвонини йўқотди.
