Таниқли футбол юлдузи Криштиану Роналду сунъий интеллект соҳасидаги стартап Perplexity AI’га сармоя киритганини эълон қилди. Унинг қиймати 20 миллиард долларга баҳоланмоқда.
Роналду бу янгиликни 4 ноябрь, пайшанба куни эълон қилиб, муваффақиятга эришишда қизиқувчанлик муҳим эканини таъкидлади.
“Ғолиблар ҳеч қачон ўрганишдан тўхтатмайди. Савол беришни тўхтатманг. Шу сабабли Perplexity’га сармоя киритганимни эълон қиламан”, дея ёзди ҳужумчи ўзинг X тармоғидаги саҳифасида.
Ҳамкорлик доирасида “Perplexity x CR7” бренди остида махсус саҳифа ишга туширилади, у Роналдунинг карьерасини акс эттиради. Футбол юлдузи бу ҳамкорликни “фақат бошланиш” деб атади ва уларнинг мақсади “ҳар бир инсонни янада амбицияли саволлар беришга илҳомлантириш” эканини таъкидлади.
Perplexity 2022-йилда ташкил этилган ва 2025 йил сентябрь ойида 200 миллион долларлик инвестиция жалб қилганидан сўнг 20 миллиард долларга баҳоланган. Роналду дастлаб платформа фойдаланувчиси бўлган, кейин эса инвесторга айланган. Октябрь ойида у Perplexity орқали Prestige Globe Award мукофоти учун нутқ тайёрлаганини билдирган.
Роналду ижтимоий тармоқларда 1 миллиарддан ортиқ кузатувчиларга эга бўлиб, унинг сармояси ва ҳамкорлиги Perplexity фойдаланувчи базасини сезиларли даражада кенгайтириши мумкин.
Маълумот учун, Криштиану Роналду УЕФА Чемпионлар Лигаси тарихидаги энг яхши тўпурар (140 гол) ва “Реал” тарихидаги энг кўп гол урган футболчи (450 гол) ҳисобланади. Бундан ташқари, у миллий жамоа тарихидаги энг кўп гол урган футболчи сифатида жаҳон рекордини ҳам ўрнатган (143 марта гол урган). Португалиялик ҳужумчи ҳозирда Саудия Арабистонининг “Ан-Насср” клубида тўп тепади.
