АҚШ Украина билан бўлиб ўтган музокаралар натижасида тинчлик режасига айрим ўзгартиришлар киритмоқда. Бу ҳақда АҚШ давлат котиби Марко Рубио хабар берди.
23 ноябрь куни Женевада АҚШ томонидан таклиф қилинган Украина учун тинчлик режаси бўйича музокаралар бўлиб ўтди. Унда Украина делегацияси Лондон, Берлин ва Париж вакиллари билан учрашди. АҚШ номидан музокараларда Марко Рубио ва Трампнинг махсус элчиси Стив Уиткофф иштирок этди.
“Бизда аллақачон барча тегишли томонларнинг таклифлари асосида қурилган жуда яхши ишчи вариант бор. Ҳозир биз баъзи бандларни кўриб чиқдик, уларни навбатма-навбат муҳокама қилдик”, деди АҚШ давлат котиби.
Унинг сўзларига кўра, томонлар маслаҳатлашувлар давомида муайян силжишга эришган.
“Бизга тақдим этилган таклифлар устида ишлаяпмиз, келишмовчиликларни камайтириш, ҳам Украина, ҳам АҚШ тўлиқ рози бўладиган вариантга яқинлашиш умидида ўзгартиришлар киритмоқдамиз”, деди у.
Рубионинг таъкидлашича, ҳар қандай режа учун Трамп ва Зеленский имзо чекиши, Россия эса ўз розилигини билдириши керак.
Украина президенти офиси раҳбари Андрей Ермак эса АҚШни, хусусан, Трампни “катта дўстлар” сифатида эътироф этиб, миннатдорлик билдирди. У Рубиони қўллаб-қувватлаб, учрашув “жуда самарали” бўлганини таъкидлади.
“Биз сезиларли силжишга эришдик ва адолатли, мустаҳкам тинчлик сари бормоқдамиз. Украина халқи бу тинчликка лойиқ ва буни ҳаммадан кўра кўпроқ хоҳлайди”, деди Ермак.
Шунингдек, у тинчлик режаси устида ишлар давом эттирилишини ва Украина европалик ҳамкорлар билан ҳам мулоқотни давом эттиришини қайд этди.
