Американинг Chevron нефть компанияси АҚШ санкциялари остида қолган Россиянинг “Лукойл” компаниясининг хориждаги активларини сотиб олиш имкониятини кўриб чиқмоқда. Бу ҳақда беш нафар манбага таяниб, Reuters хабар берди.
Манбаларга кўра, Америка энергетика гигантининг қизиқиши “Лукойл” активларининг барчасига эмас, балки Chevron билан кесишадиган лойиҳаларига қаратилган. Иккала компания ҳам Қозоғистондаги Қорачаганак ва Тенгиз конларида нефть қазиб олади. Бундан ташқари, “Лукойл” Chevron оператори бўлган Нигериянинг ОМЛ-140 шелф лойиҳасида улушга эга.
АҚШ компаниясининг ўзи “Лукойл” активларини сотиб олиш эҳтимоли ҳақидаги маълумотларга изоҳ бермади. Фақат компания ўз бизнеси бўйича амалдаги қонун ва қоидаларга қатъий риоя этишини таъкидлади.
“Лукойл” активларининг эҳтимолий харидорларидан яна бири Американинг Carlyle инвестиция компаниясини ҳисобланади. У келишувни ўрганишнинг “эрта босқичи”да эканини аниқлаган.
Bloomberg маълумотларига кўра, “Лукойл” Россиянинг барча компаниялари орасида халқаро бозорда энг кенг тарқалган. Россия нефть гиганти Европадаги нефтни қайта ишлаш заводларида, шунингдек, Ироқдан Қозоғистонгача бўлган нефть конларида катта улушларга эга. Унинг бренди АҚШдан Бельгия ва Руминиягача бўлган ҳудуддаги ёнилғи қуйиш шохобчаларида ҳам мавжуд.
