Украина коррупцияни енга олмаса, Россияга қарши урушда мағлубиятга учрайди. Бу ҳақда Польша бош вазири Дональд Туск маълум қилди.
Унинг айтишича, коррупция туфайли Киев хорижий ҳамкорлар ёрдамини йўқотиши хавфи бор.
“Агар Украинада коррупция можаролари давом этса, ҳамкорларни бу мамлакатни қўллаб-қувватлашга кўндириш тобора қийинлашади”, деди Туск.
Вазир аввалроқ Украина президенти Владимир Зеленскийни Украина Миллий аксилкоррупсия бюросини (МАБ) тугатишнинг “ҳалокатли оқибатлари” ҳақида огоҳлантирган. Туск ушбу идорани ёпишдан воз кечиш қарорини олқишлади.
- Туск: Украина коррупцияга чидаса, урушда ютқазади
“Бироқ ҳақиқат аллақачон юзага чиққан. Шунинг учун бу масалада овоз бериш ҳуқуқига эга бўлган барчани огоҳлантираман: коррупциядан эҳтиёт бўлинг, бу рус моделидан эҳтиёт бўлинг, чунки унга чидасангиз, урушда ютқазасиз”, дея огоҳлантирди Туск.
Польша бош вазири бу борада Зеленскийни ҳам огоҳлантирганини қайд этди. Унинг айтишича, Украинадаги коррупция “Россия ва Европадаги россияпараст партияларнинг асосий тарғибот мавзуларидан бири” ҳисобланади.
“Баъзилар ҳатто Украинани Россиядан кўра кўпроқ коррупсиялашган деб ҳисоблашган. Мен Зеленскийга коррупциянинг энг кичик кўринишларидан ҳам эҳтиёт бўлишини айтдим”, деди Туск.
- Украинадаги коррупция можароси
МАБ ва Ихтисослаштирилган аксилкоррупсия прокуратураси 10 ноябрь куни “Энергоатом” давлат энергетика компанияси атрофидаги кенг кўламли коррупция схемасини фош этди. Жанжал марказида Украинанинг амалдаги ҳукуматидаги бир нечта вазирлар, президентнинг узоқ йиллик сафдоши Тимур Миндич ва молиячи Александр Сукерман бўлган.
Ўша куни ҳуқуқ-тартибот идоралари Миндичнинг уйида, “Энергоатом”да ва Украина адлия вазири Герман Галушченконинг манзилида тинтув ўтказди. Миндич эса бунга қадар қисқа вақт олдин Украинани тарк этган эди.
12 ноябрь куни Зеленский адлия вазири Герман Галушченко ҳамда энергетика вазири Светлана Гринчукни ишдан бўшатишни талаб қилди.
Иккала вазир ҳам Зеленскийнинг аризасидан кейин деярли дарҳол истеъфога чиқиш тўғрисида ариза ёзди. 13 ноябрь куни Зеленский Миндич ва Сукерманга қарши санксиялар жорий этиш тўғрисидаги фармонни имзолади.
