Исроил армиясининг гуманитар ёрдамни назорат қилувчи бўлими — CОGАТ — 12 ноябрь куни Ғазонинг шимолида жойлашган Зиким чегара пункти очилганини маълум қилди. Эндиликда гуманитар ёрдам юк машиналари анклавга киритилади.
БМТнинг бир неча агентликлари узоқ вақт давомида бу пунктни қайта очишни сўраб келаётган эди. Уларнинг таъкидлашича, бу Ғазонинг шимолий қисмига, айниқса октябрь ойидагии Исроил-ҲАМАС оташкесим келишувидан сўнг, аҳолига ёрдам етказиш учун жуда зарур.
БМТнинг гуманитар масалалар бўйича идораси (OCHA)га кўра, Зиким пункти 12 сентябрь куни ёпилган ва шундан буён ҳеч бир ташкилот у орқали ёрдам олиб кира олмаган. Исроил ҳарбийлари эса ўша пайтдаги ёпилиш сабабларини изоҳлашдан бош тортган.
Жануб орқали айрим гуманитар юк машиналари киритилган бўлса-да, бу етарли эмаслиги айтилганди. Ғазо шаҳри ва атрофидаги ҳудудларда очарчилик расман эълон қилинган. CОGАТ баёнотида айтилишича, чегара пункти сиёсий раҳбарият кўрсатмасига биноан очилган.
“Ёрдам Мудофаа вазирлиги ҳузуридаги Қуруқликдаги ўтиш пунктлари бошқармаси томонидан хавфсизлик текширувларидан ўтгач, БМТ ва халқаро ташкилотлар орқали узатилади”, дейилади баёнотда.
