АҚШ ва Исроил Эронни Мексикадаги исроиллик элчига суиқасд уюштиришни режалаштиришда айблади. Бу ҳақда The Guardian хабар берди.
Мазкур айблов форс ва яҳудий давлатлари ўртасидаги зиддият бошқа минтақаларга ҳам ёйилаётганидан дарак бермоқда. Исроилнинг маълум қилишича, Мексика хавфсизлик кучлари элчи Эйнат Кранз-Найгерга уюштирилаётган суиқасдни олдини олган.
“Эрон томонидан бошқарилган террор тармоғини фош этган Мексика хавфсизлик хизматларига миннатдорчилик билдирамиз”, дейилади Исроил ташқи ишлар вазирлиги баёнотида.
АҚШ расмийсининг айтишича, бу фитна 2024 йил охирида Эрон инқилобий гвардияси таркибидаги “Қудс” кучлари томонидан режалаштирилган ва бу йилнинг бошида фош этилган. Унга кўра, режа Венесуэладаги Эрон элчихонаси орқали одам ёллашни ҳам ўз ичига олган. Расмий шунингдек, фитна тўлиқ тўхтатилганини ва ҳозирча хавф йўқлигини айтмоқда.
“Бу Эроннинг дунё бўйлаб дипломатлар, журналистлар ва мухолифларга қарши қаратилган узоқ йиллик тажовуз сиёсатининг яна бир намунаси”, деган у аноним тарзда.
Эрон томони ҳолат ҳақида изоҳ бермаган, Мексика ҳукумати ҳам ҳозирча баёнот чиқармаяпти. Мазкур суиқасд режаси Исроилнинг 2024 йил 1 апрель куни Сурия пойтахти Дамашқдаги Эрон элчихонасига уюштирган ҳужумига жавобан амалга оширилган. Ўшанда Эрон инқилобий гвардиясининг бир неча юқори мартабали зобитлари ҳалок бўлган эди. Шундан сўнг Эрон Исроилга қарши ракета ва дрон ҳужумлари уюштирган.
Орадан бир йил ўтиб, 2025-йилнинг ёз ойларида Исроил Эрон ҳудудида йирик бомбардимонлар амалга ошириб, мингдан ортиқ кишининг ўлимига сабаб бўлган. АҚШ эса бу ҳарбий операцияга аралашиб, Эроннинг ядровий объектларига зарба берган.
Эрон ҳукумати Ғазодаги ҲАМАС ҳаракатини қўллаб-қувватлаб келади. ҲАМАС 2023 йил 7 октябрь куни Исроилга ҳужум қилганидан сўнг, Исроил Ғазода кенг кўламли ҳарбий амалиёт бошлаган ва минтақадаги Эрон, Сурия, Ливан, Қатар ҳамда Яман ҳудудларини ҳам нишонга олган.
Исроил разведкаси “Қудс” кучларини хориждаги яҳудий ва исроилликларга қарши суиқасдлар режалаштирганликда айблаган. Шу йил давомида Австралия ҳам Эрон элчисини мамлакатдан чиқариб юборганди — бунга Мелбурндаги ибодатхона ва Сиднейда яҳудий ресторанига уюштирилган ҳужумлар сабаб бўлган.
Лотин Америкаси бу каби воқеалардан йироқ эмас: 1994-йилда Буэнос-Айресдаги яҳудий марказида портлаш содир бўлиб, 85 киши ҳалок бўлган. Аргентина ва Исроил бу ҳужумни Эрон топшириғи билан “Ҳизбуллоҳ” гуруҳи амалга оширганини билдирган.
