“Манчестер Сити” ҳужумчиси Эрлинг Ҳоланд Чемпионлар Лигаси 4-туридан ўрин олган “Боруссия Дортмунд”га қарши баҳс олдидан ўтказилган матбуот анжуманида иштирок этиб, журналистларнинг саволларига жавоб қайтарди. Унда норвегиялик футболчи ўзини Лионель Месси ва Криштиану Роналду билан солиштириш тўғри эмаслигини айтди. Бу ҳақда Cadena Ser нашри хабар берди.
“Уларнинг даражасидан жуда йироқман. Ҳеч ким уларга яқинлаша олмайди. Мен рекордлар ҳақида ўйламайман. Менинг вазифам – жамоага ғалабалар келтириш. Биламан, бу зерикарли эшитилади, лекин мен бунга эътибор бермайман”, деди Ҳоланд Manchester Evening News нашрига берган интервьюсида.
Маълумот учун, аввалроқ “шаҳарликлар” устози Хосеп Гвардиола Эрлинг Ҳоланднинг ўйин даражаси Месси ва Роналду билан бир хил эканлиги айтган эди.
Жорий мавсум Ҳоланд барча мусобақалар доирасида жами 17 та ўйинда майдонга тушиб, ўз ҳисобига 20 та гол ва 2 та голли узатма ёздириб қўйган. Унинг “Манчестер Сити” билан шартномаси 2034-йилга қадар амал қилади. Transfermarkt портали ҳужумчининг қийматини 180 миллион еврога баҳолаган.
