Буюк Британия қироли Чарльз III укаси шаҳзода Эндрюни унвон ва фахрий мақомлардан маҳрум қилиб, уни қироллик қароргоҳидан чиқариб юборишга қарор қилди. Бу ҳақда Букингем саройи баёнотига таяниб Reuters хабар берди.
Баёнотда айтилишича, Эндрюга Royal Lodge номли қароргоҳда ижарага туришдан воз кечиш ва хусусий уйга кўчиб ўтиш зарурлиги ҳақида огоҳлантириш юборилган. Унга нисбатан босимнинг кучайишига молиячи Жеффри Эпштейн билан алоқадорлик ҳақидаги айбловлар сабаб бўлган.
Эпштейн жинсий жиноятлар, жумладан, вояга етмаганларни фоҳишаликка жалб этгани учун судланган. Эндрю эса зўрлашда иштирок этганликда гумон қилинмоқда. Уни, хусусан, апрель ойида Австралиядаги уйида ўлик ҳолда топилган ҳуқуқ ҳимоячиси Виржиния Жуффре айблаган эди.
Аввалроқ шаҳзода Эндрю ҳарбий унвонлари, хайрия ташкилотларидаги ҳомийлик мақомлари ва “қироллик ҳазратлари” деб мурожаат этиш ҳуқуқидан маҳрум қилинган эди. The Telegraph нашри ёзишича, шаҳзода октябрь ўрталарида қирол босими остида Ёрк герсоги унвонидан ихтиёрий равишда воз кечишга қарор қилган. 65 ёшли Эндрю марҳума қиролича Елизавета II нинг иккинчи ўғли ҳисобланади.
