Янги Зеландияда 13 ёшли ўсмир интернет орқали сотиб олган 100 та кучли магнитни ютиб юборди. Оқибатда шифокорлар унинг ичагидан бир қанча тўқималарни олиб ташлашга мажбур бўлди. Бу ҳақда The Guardian хабар берди.
Тўрт кун давомида қорин оғриғидан азият чеккан бола Тауранга шифохонасига олиб борилган ва операция қилинган.
“У тахминан бир ҳафта аввал тахминан 100 дона 5х2 миллиметрли юқори қувватли неодим магнитларни ютиб юборган”, деган шифокорлардан бири.
Магнитлар Янги Зеландияда 2013 йил январь ойидан буён тақиқланган бўлишига қарамай, ўсмир онлайн савдо платформаси Temu орқали уни харид қилинган. Рентген натижаларига кўра, магнитлар ичакда некроз келтириб чиқарган.
Шифокорларнинг айтишича, магнитлар босими туфайли боланинг ингичка ичаги ва йўғон ичакнинг бошланғич қисми — секумда — тўрт жойда тўқималар некрозга учраган. Жарроҳлар ўлик тўқималарни олиб ташлаб, магнитларни чиқариб олган. Бола шифохонада саккиз кун даволанганидан сўнг уйига қайтган.
Мутахассислар магнитларни ютиш бўйича ўтказиладиган операциялар кейинчалик ичак тутилиши, чурра ва доимий оғриқлар каби асоратларга олиб келиши мумкинлигини таъкидламоқда. Айни пайтда, Тему вакиллари Янги Зеландия хавфсизлик талабларига тўлиқ риоя этилишини таъминлаш учун ички текширув бошланганини маълум қилган.
“Биз ички текширувни бошладик ва ҳолат тафсилотларини ўрганяпмиз. Ҳозирча магнитлар айнан Тему орқали харид қилингани тасдиқланмаган, бироқ барча тегишли маҳсулотлар рўйхати хавфсизлик талаблари бўйича қайта кўриб чиқилмоқда”, дейилади компания баёнотида.
