Украина президенти Владимир Зеленский мамлакати Россия билан бўлажак тинчлик музокараларида бирор бир ҳудуддан воз кечмаслигини қатъий таъкидлади. У бу ҳақда 23 октябрь куни Брюсселда бўлиб ўтаётган Европа Иттифоқи саммити доирасида таъкидлади.
“Украина ўз ҳудудининг бир қаричини ҳам бермайди. Бизнинг қуролларимиз Россиянинг 3 минг километргача ичкарисига зарба бера олади”, деган Зеленский.
Президентнинг бу баёноти Европа Иттифоқи ва АҚШ Россияга қарши янги санксиялар эълон қилганидан бир кун ўтиб янгради. Санксиялар Москвани оташкесимга рози бўлмагани учун жорий этилган.
Россиянинг талаблари ўзгармаган
Кремль ўзининг талабларини ўзгартирмаганини билдирган — Россия ҳануз Қрим ва тўлиқ назорат остига олинмаган тўртта Украина вилояти устидан ҳукмронликни сақлаб қолишни истайди.
АҚШ ОАВ хабарларига кўра, бу ҳафта Россия президенти Владимир Путин Қўшма Штатлар президенти Дональд Трампга янги таклиф берган: унга кўра, Украина ўз назоратидаги Донбасснинг айрим қисмларидан воз кечиши эвазига Херсон ва Запорожье вилоятларининг кичик ҳудудларини қайтариб олиши мумкин бўлади.
Россия бу минтақаларни 2014-йилдан бери тўлиқ эгаллашга уриниб келмоқда, бироқ ҳозиргача бунга эриша олмаган. Кремль яна бир бор ўз позициясини тасдиқлаб, Қрим билан бирга Донецк, Луганск, Херсон ва Запорожье вилоятларининг тўлиқ назоратини қўлга киритиш ниятида эканини билдирган.
“Путин бутун Украинани истайди”
Дональд Трамп ҳам 22 октябрь куни Россия раҳбари Путиннинг ҳудудий мақсадлари камаймаганини айтган.
“Мен ҳар доим у бутун Украинани хоҳлашини ҳис қилганман, фақат бир бўлагини эмас”, деган Трамп журналистларга.
Зеленский музокаралар учун шартини айтди
Зеленский аввалроқ Россиянинг урушини жорий фронт чизиғида “музлатиб қўйиш”ни “мақбул муроса” деб атаган эди. Унинг фикрича, бу тинчликка эришиш йўлидаги биринчи қадам сифатида оташкесимга эришиш имконини беради.
“Бу урушни бутунлай тўхтатиш режаси эмас, бу асосан оташкесим режаси. Мен бу таклифни Трамп билан ҳам муҳокама қилдим”. деди Зеленский Норвегияга ташрифи чоғида.
