АҚШ федерал ҳукумати фаолиятининг тўхтатилиши мана 3 ҳафтадирки давом этмоқда. Мамлакат молия вазири Скотт Бессент бу ҳолат иқтисодиётга жиддий таъсир кўрсата бошлагани ҳақида огоҳлантирди. Унга кўра, иқтисодий зарар ҳафтасига 15 миллиард долларни ташкил этмоқда.
Ҳарбий хизматчилар маоши тўланиши учун бошқа федерал ходимларга ва давлат хизматларига тўловлар кечиктирилмоқда ёки тўхтатилмоқда. Шу сабаб мамлакат бўйлаб минглаб ходимлар ишдан бўшатилган.
Маълумотларга кўра, шатдаун АҚШ ялпи ички маҳсулотининг 0,1 фоизга камайишига олиб келади. Тахминан 7 миллиард доллар зарар етказади. Айримлар ҳафталик зарар 15 миллиард долларгача етиши мумкинлигини таъкидламоқда.
Сенатда сиёсий тортишувлар ҳамон сақланиб қолмоқда. Демократлар соғлиқни сақлаш соҳасидаги субсидияларни сақлаб қолишни талаб қилмоқда, республикачилар, аввало, ҳукуматни шакллантиришни талаб қилган.
Ҳукумат шатдауни сабабли 750 мингга яқин федерал ходим иш ҳақисиз таътилга чиққан. Ҳарбийлар ва авиация ходимлари маош олмасдан ишламоқда. АҚШда 1980-йилдан бери 15 марта ҳукумат шатдауни кузатилган. Энг узун муддатли шатдаун 2018–2019-йилларда бўлиб, 35 кун давом этганди.
