Германиядаги Rombergpark ботаника боғидан номаълум шахслар дунёдаги энг бадбўй гулни ўғирлаб кетди. Бу ҳақда Spiegel хабар берди.
Ботаника боғи Дортмунд шаҳрида жойлашган, гул аморфофаллус титанум (Amorphophallus titanum) деб номлаган. У гуллаш пайтида ўзида чириган гўшт ҳидини таратади. Номаълум шахслар тувакдан ноёб гулнинг оғирлиги 20-30 килограмм келадиган тугунагини қазиб олган. Боғ ходимлари ўғирланган гул қисмини “Давид” деб номлаган. Ҳолат юзасидан полицияга шикоят қилинган.
“Давид”нинг ўғирланиши биз учун оғир зарба бўлди. Дортмунднинг кўплаб аҳолиси навбатдаги гуллашни кутаётган эди. Умид қиламизки, ўғрилар ўз қароридан афсусланади ва уни қайтариб олиб келади, деди ботаника боғи ходими.
У ботаника боғи ва Дортмунд шаҳри учун йўқотиш “катта” эканини қўшимча қилган. 2018 ва 2021 йилларда ўсимлик гуллаш даврида ботаника боғига минглаб меҳмонлар ташриф буюрган.
Amorphophallus titanum ноёб ўсимлик бўлиб, кам ва қисқа муддатли гуллаши билан ажралиб туради. Бу бир неча йилда бир марта содир бўлади ва атиги бир неча кун давом этади. У дунёдаги энг катта тўпгулга эга ва чириган гўштнинг ўткир ҳидини таратади.
