Дания бош вазири Метте Фредериксеннинг турмуш ўртоғи, кинорежиссёр Бо Тенгберг Украина президенти Владимир Зеленский ҳақида ҳужжатли фильм суратга олади. Бу ҳақда Экстра Бладет хабар берди.
Фильм “Конфликт” деб номланади ва у Россия билан уруш даврида Украина раҳбарининг фаолияти ҳақида ҳикоя қилади. Лойиҳа Seabird Production компанияси томонидан ишлаб чиқилмоқда, унинг ҳаммуассиси Тенгбергнинг ўзи ҳисобланади. 2024 йилда компания фильмни яратиш учун Дания кино институтидан 190 минг крон (тахминан 30 минг доллар) грант олган.
Таъкидланишича, ҳужжатли фильм муаллифига “Украина президентига алоҳида яқинлашиш имконияти берилган”.
Турмуш ўртоғи сабабли Бо Тенгберг Украина президенти билан яқин алоқаларга эга, чунки улар Украинада ҳам, Данияда ҳам бир неча бор расмий тадбирларда учрашган, дейилади мақолада.
Сентябрь ойида Тенгберг шахсан Украинага ташриф буюрган эди. Ўшанда Зеленский уни алоҳида хизматлари учун бериладиган “Княз Ярослав донишманд” ордени билан тақдирлаган.
Украина ва Дания алоқалари
Дания ҳукумати Украинага умумий қиймати 4,2 миллиард крон (тахминан 630 миллион доллар) бўлган 26-ҳарбий ёрдам пакетини тайёрламоқда. 2025—2028 йилларга мўлжалланган янги пакетга артиллерия, ўқ-дорилар, қирувчи самолётлар учун эҳтиёт қисмлар, шунингдек, Украина ҳарбийларини тайёрлашнинг кенгайтирилган дастури киради.
2024 йилда Зеленский ва Фредериксен Украина ҳамда Дания ўртасида хавфсизлик соҳасида узоқ муддатли ҳамкорлик тўғрисида шартнома имзолаган эди.
