Венесуэла президенти Николас Мадуро мамлакат пойтахти Каракасдаги АҚШ элчихонасига уюштирилган фитнанинг олдини олганини маълум қилди. Унга кўра, маҳаллий террорчи гуруҳ бинога портловчи қурилма ўрнатишга уринган.
Мадуро бу ҳолатни АҚШ билан муносабатлардаги тангликни янада кучайтиришга қаратилган провокация деб атамоқда. У бу ҳодиса атайин уюштирилганини таъкидламоқда. Президент бу маълумотни ўзининг ҳафталик баёнотида тақдим этган.
Унинг айтишича, иккита манба Каракасдаги АҚШ элчихонасида маҳаллий террорчилар томонидан портловчи қурилма жойлаштирганини билдирган. Манбалар номи эса ошкор этилмаган. Венесуэла ва АҚШ ўртасидаги музокараларда иштирок этаётган делегация раҳбари Хорхе Родригесга кўра, Каракас Вашингтонни бу таҳдид ҳақида огоҳлантирган.
“Биз элчихона хавфсизлигини кучайтирдик. АҚШ ҳукумати билан қандай зиддиятларимиз бўлмасин, элчихона ҳимоясиз қолмайди”, деган Мадуро.
Мадуронинг айтишича, ҳодисани режалаштирганлар аниқланган ва ҳозирда уларни қўлга олиш чоралари кўрилмоқда.
“Бунинг орқасида турган ва буйруқ берган шахслар тез орада маълум қилинади. Режанинг мақсади — бизни айбдор қилиб кўрсатиш ва можарони кучайтириш”, деган президент.
АҚШ–Венесуэла муносабатлари кескинлашмоқда
Венесуэла ва АҚШ ўртасидаги дипломатик алоқалар 2019 йилда кескинлаша бошлаган. Ҳозирда Қўшма Штатлар элчихонаси фақат чекланган ходимлар асосида фаолият юритмоқда. Сўнгги ҳафталарда Қўшма Штатлар ҳарбийлари Венесуэлага тегишли 4 та қайиққа гиёҳванд моддалар ташилаётгани гумони билан зарба берган. Бу ҳужумларда 20 дан ортиқ одам ҳалок бўлгани айтилмоқда.
Бу воқеаларга жавобан Каракас расмийлари мамлакат қуруқлик ва денгиз чегараларига минглаб ҳарбийларни жойлаштирган. Трамп эса Конгрессга АҚШ наркокартелларга қарши урушга кирганини билдирган.
