АҚШ президенти Дональд Трамп яқин ҳафталарда хитойлик ҳамкасби Си Цзиньпин билан Жанубий Кореяда учрашишни таъкидлади. Бу ҳақда у Оқ уйда Канада бош вазири Марк Карни билан бўлган суҳбатда маълум қилди.
“Мен Хитой раҳбари Си билан яхши муносабатдаман. Бир неча ҳафтадан сўнг у билан Жанубий Кореяда учрашаман. Биз узоқ йиллардан бери яхши алоқадамиз”, деган Трамп.
Трамп шунингдек, Пекин билан муносабатларда муваффақиятга эришиш учун Хитой билан рақобатлаша олиш кераклигини таъкидлаган. АҚШ президенти дастлаб 1 октябрь куни Си Цзиньпин билан уч ҳафтадан сўнг учрашишини айтганди.
BBC’нинг хабар беришича, баҳор ойларида Хитой АҚШ босимларига бўйсунмаслигини ва савдо урушида охиригача курашишини билдирган. Шу воқеа фонида Си Цзиньпин Европа Иттифоқига мурожаат қилиб, Вашингтон томонидан жорий этилган бож ставкаларига эътироз билдирган. Трамп эса бунга жавобан Хитойга Boeing самолётларини сотишни тўхтатган эди.
Кейинроқ, АҚШ оммавий ахборот воситалари Трамп 70 та давлат билан бож сиёсати бўйича музокаралар ўтказиб, уларни Хитойга босим ўтказишга ва савдо алоқаларини қисқартиришга ундашни режалаштираётганини хабар қилган.
Бунга жавобан Хитой АҚШдан таҳдидлар эмас, балки мулоқот ва музокаралар орқали муаммоларни ҳал қилишни талаб қилган. Шундан сўнг Пекин Вашингтон маҳсулотларига қўйилган 125 фоизлик бож ставкасини айрим товарлар учун бекор қилган.
Сўнгра, Қўшма Штатлар ҳам Хитойдан импорт қилинадиган арзон товарлар учун бож имтиёзларини бекор қилган. Июль ойининг охирида эса икки давлат ўртасида савдо бўйича музокаралар бўлиб ўтган ва Америка томони ушбу келишув доирасида Хитойга нисбатан айрим чекловларни бекор қилишга рози бўлган. Лекин ҳалигача икки давлат ўртасида савдо божлари борасида аниқ келишувга эришилмаган.
