Калифорния губернатори ва Демократик партия аъзоси Гевин Нюсом АҚШ ҳукумати фаолияти тўхтатилиши шароитида ўзини энди “эркин дунё раҳбари” эканини маълум қилди. Бу ҳақда у X ижтимоий тармоғида ёзиб қолдирди.
Нюсом ўз дастури “жуда оддий” эканини таъкидлаб, унинг моҳиятини қисқача баён этган. Дастурга кўра, барча америкаликлар учун соғлиқни сақлаш хизматларидан фойдаланиш имконияти, мактабларда бепул овқатланиш, бепул болалар парвариши, бепул тухум, юқори маошли иш ўринлари ва “ҳеч қандай даҳшатли тарифлар” назарда тутилган.“Хушхабар, ватанпарварлар! Вашингтон ишламай турган бир пайтда, мен, Гевин К. Нюсом, эркин дунё раҳбарига айландим”, дейилади хабарда.
У киноя билан соч учун геллардан фойдаланишга субсидиялар жорий қилишини, “аммо фақат келишган демократлар учун”лигини қўшимча қилган. Бундан ташқари, у каннабисни қонунийлаштириш, чипталар учун тўловларни бекор қилиш ва жиноятчилик даражасини паст сақлаб қолишга ваъда берган.
Аввалроқ Европа Иттифоқининг ташқи ишлар ва хавфсизлик сиёсати бўйича олий вакили Кая Каллас эркин дунёга Қўшма Штатлар ўрнига янги раҳбар кераклигини айтган эди.
1 октябрь куни АҚШда расман шатдаун бошланди - ҳукумат иши тўхтатилди, чунки сенат бюджет лойиҳасини ма’қулламади. Бунга соғлиқни сақлашни молиялаштириш бўйича демократлар ва республикачилар ўртасидаги келишмовчиликлар сабаб бўлди. Энди юз минглаб давлат хизматчилари маош тўланмайдиган таътилга чиқади, фавқулодда вазият ходимлари эса бепул ишлашга мажбур бўлади.
