АҚШда Трамп маъмурияти, хусусан Илон Маск бошчилигидаги департмент томонидан ишдан олинган юзлаб федерал ходимларга ишга қайтиш таклиф қилинди.
Associated Press’нинг ёзишича, ҳукумат биноларини бошқарувчи GSА агентлиги ( General Services Administration ) бу ходимларга ҳафтанинг охиригача ишга қайтиш ёки қайтмаслиги ҳақида жавоб беришни сўраган.
Март ойида минглаб GSА ходимлари ишдан бўшатилган ёки эрта нафақага чиқарилган эди. Бу Илон Маск бошчилигидаги Ҳукумат самарадорлиги департаменти (DOGE) томонидан амалга оширилган кескин қисқартиришлар натижаси эди. Натижада агентлик ходим етишмовчилигига юз тутган.
Ходимларга расмий чақирув юборилган ва улар 6 октябрь куни ишга қайтиши кутилмоқда. Айрим ҳолларда GSА ишчи кучи етишмагани туфайли ўз фаолиятини давом эттира олмаган ва ижараси тугатилиши керак бўлган давлат биноларини бўшатмасдан, бюджет ҳисобидан катта харажатлар қилинган.
Конгрессдаги демократлар бу қисқартиришларни танқид қилиб, бу “тежаш эмас, балки тартибсизлик ва қўшимча харажатлар”га олиб келганини таъкидлаган. GSА раҳбарияти эса ишга қайтариш қарори мижоз-агентликлар ва солиқ тўловчиларнинг манфаатини ҳисобга олиб қабул қилинганини билдирмоқда.
DOGE дастлаб агентлик штатини қисқартириш, минглаб ижара шартномаларини бекор қилиш ва федерал биноларни сотиш орқали миллиардлаб доллар тежашни мақсад қилган эди. Бироқ ҳозирда бу режаларнинг оқибатлари АҚШ конгрессининг ҳисоб палатаси томонидан ўрганилмоқда.
