Украина президенти Владимир Зеленский қозоғистонлик ҳамкасби Қосим-Жўмарт Тўқаев билан учрашганини маълум қилди. Бу ҳақда сиёсатчи ўзининг Telegram каналида хабар берди.
Зеленский ўз баёнотида Украинанинг суверенитети ва ҳудудий яхлитлигини қўллаб-қувватлагани учун Қозоғистонга миннатдорлик билдирди.
”Эндиликда асосий вазифа - адолатли ва узоқ муддатли тинчликка, хавфсизликнинг ишончли кафолатларига эришишдан иборат. Украина, АҚШ, Европа ва дунёдаги бошқа ҳамкорларнинг бу урушни тугатиш ва қотилликларни тўхтатиш борасидаги саъй-ҳаракатлари батафсил муҳокама қилинди.
Савдо-иқтисодий ҳамкорлик, Қозоғистон компанияларининг Украинани тиклашда иштирок этишдан манфаатдорлиги масалаларига алоҳида тўхталиб ўтилди. Қозоғистонга Украинанинг суверенитети ва ҳудудий яхлитлигини қўллаб-қувватлагани учун миннатдорчилик билдираман”, деди Зеленский.
Қозоғистон президенти матбуот хизмати баёноти
Учрашув БМТ Бош Ассамблеясининг 80-сессияси доирасида бўлиб ўтган. Унда етакчилар икки томонлама иқтисодий ва гуманитар ҳамкорлик масалаларини муҳокама қилган. Владимир Зеленский Украинадаги вазият бўйича ўз фикрини билдирган.
“Қозоғистон президенти ушбу ўта мураккаб вазиятда можарони тўхтатиш йўлларини излаш мақсадида дипломатик ишларни давом эттириш керак, деган фикрни билдирди”, дейди Тўқаевнинг матбуот хизмати.
