Украина Россия бошлаб берган урушни тўхтатиш ва украиналик болаларни ватанга қайтариш устида ишламоқда. Бу ҳақда БМТ ташкил этилганининг 80 йиллиги муносабати билан ўтказилаётган йиғилишда мамлакат президенти Владимир Зеленский маълум қилди.
“Биз Россия агрессиясини унутмаймиз. Урушни тўхтатиш учун бор кучимизни сарфламоқдамиз. Болаларимиз учун узоқ муддатли хавфсизликни таъминлаш йўлида ишламоқдамиз”, деган Украина президенти.
У, шунингдек, бу йўлда халқаро шериклик ва ёрдам муҳимлигини таъкидлаган:
“Узоқ муддатли хавфсизликни кафолатлаш учун кўмак зарур. Ишонаманки, бу дипломатик ҳафта давомида қўллаб-қувватлаш ва ёрдамга эришамиз”.
Президент матбуот хизмати баёнотига кўра, Украина делегацияси биринчи хоним Елена Зеленская билан бирга “Украина болаларини қайтариш бўйича коалиция” етакчилари саммитида ҳамда “Қрим платформаси” йиғилишида қатнашмоқда.
