Европа комиссияси Украинага бостириб киргани учун Россияга қарши санкцияларнинг 19-пакетини қабул қилди. Бу ҳақда комиссиянинг матбуот котиби Паула Пинё хабар берди.
The Guardian нашрининг ёзишича, Россияга нисбатан қўлланаётган янги чекловлар нимани ўз ичига олиши ҳозирча маълум эмас. Еврокомиссия раҳбари Урсула фон дер Ляйен ва Европа Иттифоқининг ташқи сиёсат бўйича раҳбари Кая Каллас 19 сентябрь куни санкцияларнинг тафсилотини эълон қилади.
Politico нашри 17 сентябрь куни Европа Иттифоқи Россияга янги чекловларни ма’қуллаши мумкинлигини ёзганди. Бироқ муддат кейинга сурилган.
Европа Иттифоқи чекловлар пакетини тайёрлаётганда Россия банклари ва энергетика компанияларига қарши чоралар қўлланишини билдирганди. Шунингдек, Италиянинг ANSA агентлиги россияликлар учун Европа визасини қатъийлаштириш масаласи ҳам муҳокама қилинганини ёзди.
АҚШ президенти Дональд Трамп ҳам Владимир Путиннинг ҳаракатларини танқид қилаётган бўлса-да, Европанинг Россияга босим ва санкцияларни кучайтириш сиёсатини қўллаб-қувватламаган. Трамп G7 (Катта еттилик) давлатлари, НАТО ва Европа Иттифоқидан Россия нефтьини сотиб олаётган Хитой ва Ҳиндистонга божларни 50 фоиздан 100 фоизгача оширишни талаб қилмоқда. Дипломатлар Трампнинг талабини бажариш имконсизлигини таъкидлаб, бу ҳаракатларни вақтни чўзиш ва урушнинг давом этишида Европани айблашга уриниш сифатида баҳолаган.
