Руминияда собиқ президентликка номзод Келин Жоржескуга давлат тузумини ағдаришга уриниш иши бўйича айблов қўйилди. Бу ҳақда Reuters хабар берди.
Жоржеску олтита моддада, жумладан конституциявий тузумга путур етказишда иштирок этиш, сохта маълумот тарқатиш ва антисемитик ташкилот тузишда айбланмоқда. Руминия бош прокурори Алекс Флорента таъкидлашича, Жоржеску асосий давлат муассасаларига қарши киберҳужумлар, дезинформация кампаниялари ва ижтимоий тармоқлардаги тарғибот орқали “Россиянинг гибрид ҳарбий ҳаракатларидан манфаатдор бўлган”.
Худди шу иш доирасида яна 21 кишига айблов эълон қилинган. Улар орасида Жоржескунинг яқин ҳамкори — собиқ ҳарбий ва хусусий ҳарбий компания эгаси Горациу Потра ҳам бор. Прокуратура маълумотига кўра, у 2024 йилда президентлик сайловлари бекор қилингач, тартибсизликлар уюштириш ва ҳукуматни ағдариш режасини ишлаб чиққан ҳамда Бухарестга қурол-яроғ етказишни ташкил этган.
Потра Руминиядан қочиб кетган ва ҳозирда қидирувда. Ғарбга қарши қарашлари билан танилган Келин Жоржеску 2024 йил ноябрь ойида Руминияда бўлиб ўтган президентлик сайловларининг биринчи турида ғалаба қозонган эди. Бироқ Конституциявий суд уни чет эл аралашуви шубҳаси туфайли четлатган.
