АҚШ президенти Дональд Трамп маъмурияти илк бор янги схема асосида Украинага қурол етказиб беришни маъқуллади. Бу ҳақда иккита манбага таяниб, Reuters хабар берди.
Аллақачон 500 миллион долларлик иккита қурол-яроғ пакети тасдиқланган. Бу НАТО давлатлари маблағларидан фойдаланган ҳолда Украинага Америка захираларидан қурол етказиб беришга қаратилган. Бу “Украинанинг устувор талаблари рўйхати” (ПУРЛ) деб номланган янги механизмнинг биринчи қўлланилиши бўлади.
Август ойида Россия босқинидан ҳимояланаётган Киев АҚШга хавфсизлик кафолатлари учун 100 млрд долларлик келишув таклиф қилганди. Агар Вашингтон Украинага хавфсизлик кафолатларини берса, у АҚШдан 100 млрд долларлик қурол сотиб олади. Битимни эса Европа давлатлари молиялаштиради, Украина президенти Владимир Зеленский шундай таклиф билан чиққанди.
Янги моделдан фойдаланиш қарори Дональд Трампнинг сайловолди ваъдаларига мос келади. У Европа давлатларининг коллектив мудофаа учун молиявий ҳиссасини оширишни талаб қилган. АҚШ ҳали ҳам Украинага асосий қурол етказиб берувчи бўлиб қолмоқда. Бироқ янги механизмга кўра, бу харажатларни энди шерик давлатлар қоплайди. Бу ҳам Оқ уйнинг иттифоқчилар зиммасига кўпроқ масъулият юклаш сиёсатига мос келади.
