Мадриднинг “Реал” клуби Чемпионлар Лигаси баҳслари олдидан кутилмаган можарога дуч келди. Бу ҳақда Испаниянинг АS нашри хабар берди.
Маълум бўлишича, жамоа машғулоти белгиланган вақтдан бир соатга кеч бошланган. Сабаби — футболчиларнинг допинг назоратидан ўтиш жараёни ҳаддан ташқари чўзилиб кетган. “Қироллик клуби” раҳбарияти бу ҳолат тасодиф эмас, балки атайлаб уюштирилган, деб ҳисобламоқда.
Клубдагиларнинг фикрича, Ла Лига раҳбарияти айнан Чемпионлар Лигаси олдидан “Реал”нинг тайёргарлигига халақит бериш мақсадида допинг назоратчиларига вақтни белгиланган пайтдан чўзиш кераклиги ҳақида топшириқ берган. Бироқ Ла Лига бу айбловларни рад этиб, допинг назоратини мустақил компания амалга оширишини, у эса Испания Таълим ва спорт вазирлигига бўйсунишини билдирган.
Шунга қарамай, “Реал” машғулотни ўтказди, аммо йиғин белгиланган пайтдан бир соатга кечикиб бошланган. Айни пайт Мадрид клуби 16 сентябрдан 17 сентябрга ўтар кечаси бўлиб ўтадиган “Марсель”га қарши учрашувга тайёргарлик кўрмоқда. Жамоа шу куни Европа Чемпионлар Лигасининг янги мавсуми 1-тур учрашувини ўтказади.
Маълумот учун, “Реал” Испания Ла Лигасининг дастлабки 4 туридан кейин 12 очко билан турнир жадвалида якка пешқадамлик қилмоқда. Улардан кейинги ўриндан 10 очкога эга “Барселона” жой олган.
