Британиялик собиқ профессионал боксчи, енгил ярим ўрта ва ярим ўрта вазн тоифаларида жаҳон чемпиони бўлган Рикки Ҳаттон 46 ёшида вафот этди. Бу ҳақда Reuters нашри хабар берди.
Манчестер полицияси берган маълумотга кўра, якшанба куни эрталаб боксчининг Ҳайд шаҳридаги хонадонида унинг жасади топилган. Расмийларга кўра, вафот билан боғлиқ ҳеч қандай шубҳали ҳолатлар аниқланмаган.
Ҳаттон профессионал фаолиятини 1997-йилда бошлаган ва 2012-йилда рингни тарк этган эди. У умумий ҳисобда 48 жанг ўтказиб, 45 тасида ғалаба қозонган. Унинг энг машҳур ғалабаларидан бири 2005-йилда австралиялик Костя Сюга қарши IBF камарини қўлга киритган жанги саналади. У ўша жангда ўзининг WBU камарини ҳам ҳимоя қилган эди.
43 жанглик мағлубияциз сериясига эга Ҳаттон 2007-йилда Лас-Вегасда Флойд Мейвезерга қарши жангда илк бор нокаутга учраган. Ушбу мағлубиятдан сўнг унинг фаолиятида кескин пасайиш кузатилган.
Ҳаттон фаолиятини якунлагач, интервюларининг бирида руҳий тушкунлик, депрессия, ичкилик ва гиёҳвандлик билан курашганини тан олган эди.
“Спиртли ичимликларга муккасидан кетдим, бу эса гиёҳвандликка олиб келди. Гўё назоратдан чиққан поезддек эдим”, деган эди Ҳаттон 2016-йилда BBC радиосига берган интервюсида.
Қайд этилишича, у жорий йил охирида Дубайда бўлиб ўтиши режалаштирилган кўргазмали жангда рингга қайтиши кутилаётган эди.
