Буюк Британиянинг Goal нашри 2026-йилнинг ёзида АҚШ, Мексика ва Канада майдонларида ўтадиган Жаҳон чемпионати фаворитлари эълон қилди. Унга кўра, Ўзбекистон милллий терма жамоаси рўйхатнинг 25-поғонасидан жой олган.
Ҳозирга қадар мундиалга 18 терма жамоа йўлланма олган бўлса, яна 30 та жамоа номи саралаш босқичлари якунлангач аниқланади. Шунга қарамай, нашр катта эҳтимол билан мундиал йўлланмасини қўлга киритадиган кучли жамоаларни ҳам рўйхатга киритди.
Goal талқинича, 2026-йилги мундиалнинг асосий фаворити Испания терма жамоаси ҳисобланади. Испания 2024-йилги Европа чемпионатида ажойиб ўйин кўрсатиб, бош совринга эга чиққан. Шу боис улар Жаҳон чемпионатида ҳам яхши ўйин кўрсатиши тахмин қилинмоқда. Иккинчи ўринда амалдаги жаҳон чемпиони, Лионель Месси бошчилигидаги Аргентина қайд этилган. Кучли учликни Англия якунлаб берган.
Goal нашрига кўра, ЖЧ-2026 мусобақасининг асосий фаворитлари:
1. Испания
2. Аргентина
3. Англия
4. Португалия
5. Франция
6. Германия
7. Нидерландия
8. Бразилия
9. Марокаш
10. Эквадор
Нашрда ёзилишича, Ўзбекистоннинг CAFA Nations Cup мусобақаси финалида эришган ғалабаси терма жамоага кучли руҳий туртки бериши мумкин. Шу сабабли, жамоанинг ЖЧ–2026 мусобақасида ҳам муносиб иштирок этиши кутилмоқда. Бундан ташқари, Аббосбек Файзуллаев, Элдор Шомуродов ва Абдуқодир Ҳусанов каби футболчиларнинг борлиги Ўзбекистоннинг плей-офф босқичига чиқиш имкониятларини ошираётгани алоҳида таъкидланган.
Шунингдек, Жанубий Корея (11-ўрин), Япония (12), Австралия (21) ва Эрон (22) каби терма жамоалар Ўзбекистондан юқори ўринларни эгаллаган. Осиё қитъасининг яна бир вакили Иордания эса 27-поғонада қайд этилган.
