Қозоғистонда бир палатали парламент ташкил этилиши мумкин. Бу ҳақда давлат раҳбари Қосим Жўмарт Тўқаев халққа қилган мурожаатида маълум қилди.
“Ўзим ҳам ўн йил давомида Сенатга раҳбарлик қилганман ва бу вазифани доимо катта шараф ва масъулият деб билганман. Шунинг учун бу минбардан туриб парламент ислоҳоти ҳақида гапириш мен учун осон эмас. Шундай бўлса-да, айнан бугун яқин келажакда мамлакатимизда бир палатали Парламент ташкил этиш таклифини илгари сурмоқчиман”, деди Тўқаев.
Президент бу жуда жиддий масала эканини, уни ҳал қилишда шошма-шошарликка йўл қўйиб бўлмаслигини таъкидлади. Шу сабабдан фуқаролик жамиятида, экспертлар доирасида ва амалдаги Парламентда муҳокама қилиш кераклигини айтди.
“Ислоҳотнинг ғайриоддий хусусиятини ҳисобга олган ҳолда, муҳокамани ўтказиш учун камида 1 йил талаб этилади. Шундан сўнг 2027-йилда умуммиллий референдум ўтказиш, кейин эса Конституцияга зарур ўзгартиришлар киритиш мумкин бўларди. Давлат тақдир учун аҳамиятга эга бўлган барча масалалар фақат халқ розилиги билан ҳал этилиши ҳақида кўп бор таъкидлаганман”, деди Қозоғистон президенти.
Сиёсатчига кўра, Мажлиснинг ҳозирги таркиби ўз ваколатларини тугатгунга қадар одатдагидек фаолият юритади. Сиёсий партиялар эса бу вақт ичида рақобатга тайёргарлик кўриш имкониятига эга бўлади.
“Албатта, ўринли савол туғилиши мумкин: нега президент парламент ислоҳотини ўтказиш зарурлигини бунчалик эрта эълон қилмоқда, ваҳоланки сиёсий технологияларга кўра бундай чоралар кутилмаганда қабул қилиниши керак эмасми? Бироқ, аввал ҳам айтганман ва яна такрорлайман: мамлакат ва халқ тақдири ҳақида гап кетганда очиқ сиёсат юритиш лозим, бундай кенг кўламли ислоҳотни жамиятдан яшириш мумкин эмас, деб ҳисоблайман”, дея хулоса қилган у.
