Украина президенти Владимир Зеленский Россия раҳбари Владимир Путинга Киевда музокара ўтказиш таклифини берди ва Москвага боришни рад этди. Бу ҳақда ABC News хабар берди.
«У Киевга келсин. Ватанимга ҳар куни ракеталар билан ҳужум қилинаётган бир пайтда Москвага боролмайман. Террористлар пойтахтига бормайман», деди Владимир Зеленский
ABC News нашрига берган интервюсида.
Унинг айтишича, Путин бу ҳолатни «яхши тушунади». Зеленский ва журналист Марта Раддац Ғарбий Украинадаги АҚШга тегишли бўлган, яқинда Россия ракеталари ҳужумига учраган завод ҳудудида интервью ўтказган. Украина раҳбарига кўра, Путин аслида учрашув ўтказишни истамайди ва урушни давом эттириш тарафдори.
Владимир Путин 3 сентябрь куни Зеленский билан учрашишга ҳеч қачон қарши бўлмаганини билдирган ва агар у тайёр бўлса, Москвага келишини айтган эди. Бироқ Зеленский бу таклифни реал музокарадан чалғитиш деб баҳолаган.
Украина ташқи ишлар вазири Андрий Сибига эса ҳафта давомида Х ижтимоий тармоғида Австрия, Ватикан, Швейцария, Туркия ва Форс кўрфазидаги 3 та давлатни тилга олиб, бу мамлакатлар Зеленский иштирокидаги тинчлик музокараларини ўтказишга тайёр эканини билдирган.
«Агар инсон уруш пайтида учрашишни истамаса, албатта, у мен ёки бошқа томонлар учун қабул қилиб бўлмайдиган таклифлар қилади», деган Зеленский интервью давомида.
