Россия президенти Владимир Путин украиналик ҳамкасби Владимир Зеленскийни Москвада учрашувга таклиф қилганди. Зеленский мазкур таклиф музокараларни чўзишга қаратилганини айтди ва унга рад жавобини берди.
«Америкалик ҳамкорлар Путин мени Москвага таклиф қилганини етказди. Учрашув бўлмасин десанг, мени Москвага таклиф қил. Менимча, шу сабабли Россия учрашув ҳақида гапира бошлади — бу ёмон эмас. Аммо ҳозирча биз уларнинг урушни тугатиш истагини кўрмайапмиз. Катта етакчилар бундай даражадаги учрашувдан натижа билан чиқиши керак. Энг яхшиси – урушнинг тугаши билан», деди Зеленский.Шунингдек, у «Кўнгиллилар коалицияси» йиғилишида эришилган келишувлар натижалари ҳақида гапирди. Хусусан, президент ҳамкорлар хавфсизлик кафолатлари доирасида ўз контингентининг Украина ҳудудида бўлишига келишиб олганини айтди.
«Бу кўп таркибли инфратузилма. Аввало бу иштирокдир. Биз келишиб олдик, улар иштирок этади. Миқдори ҳақида ҳозирча гапиришга тайёр эмасман. Аммо, ростини айтсам, биз ўзаро бўлишиб олдик. Биз аллақачон рози бўлганларнинг тахминий сонини биламиз. Бу иштирок турлича бўлади — ҳавода ҳам, денгизда ҳам, қуруқликда ҳам», дея қўшимча қилди Зеленский.
Россия президенти 3 сентябрь куни Зеленский музокара истаса, Москвага келиши кераклигини айтганди. Бу чақириққа жавобан Украина томони таклифни нореал ва қабул қилиб бўлмайдиган деб атади. Тегишли баёнот президент маслаҳатчиси Дмитрий Литвин ҳамда ташқи ишлар вазири Андрей Сибига томонидан эълон қилинди.
Путин уруш тез орада тугаши мумкинлигини айтса-да, Россия Донбас ҳудудидан воз кечмаслигини ва мақсадларини куч билан амалга оширишини маълум қилган. Бундан ташқари, у Украинанинг НАТОга аъзо бўлишга интилмаслигини талаб қилмоқда.
